«А» корпусына іріктеуден 17 жауапты хатшының біреуі өте алмады
Бұл туралы бүгін ҚР Президенті жанындағы Орталық коммуникациялар қызметіндегі брифингте ҚР Мемлекеттік қызмет істері агенттігінің төрағасы Әлихан Бәйменов мәлім етті.
«Қазіргі уақытта «А» корпусының лауазымдарында жұмыс атқаратын мемлекеттік қызметшілердің кейбір тестілеу нәтижелеріне тоқталатын болсақ, лауазымдары «А» корпусына өтетін мемлекеттік қызметшілер қатарынан 511 адам осы корпусқа іріктеуге қатысу үшін құжаттарын тапсырды. Олардың ішінен 155 кандидат, яғни 30 пайызы шекті мәннен өте алмады», -деді Ә. Бәйменов.
Соның ішінде 17 жауапты хатшының біреуі, облыс әкімдері аппараттары басшыларының екеуі, 41 комитет төрағаларының сегізі, 75 тексеру комиссияларының төрағалары мен мүшелерінен 20-сы, 191 қала, аудан әкімдерінің 54-і, Мемлекеттік қызмет істері агенттігінің 16 тәртіптік кеңестері төрағаларының 2-еуі, сондай-ақ басқа да мемлекеттік қызметшілер сынның бірінші кезеңін еңсере алмады.
Енді бұл азаматтар іріктеудің келесі кезеңіне жіберілмейді.