Әбиба Олимпиада жүлдесінің жолашары болуы мүмкін – Бимырза Тайжанов

АТЫРАУ. KAZINFORM – Екі күннен кейін Париж төрінде Олимпиада ойындарының жалауы көтеріледі. Жаһан жұрты көз тігетін, дүбірге толы болатын додада дзюдодан алғашқы бәсекеде Әбиба Әбужақынова бақ сынайды. Қазақ дзюдошысының дайындығы қалай өтті? Оның қарсыластары кімдер болуы мүмкін? KAZINFORM тілшісінің сауалдарына Атырау облыстық дзюдо федерациясының вице-президенті Бимырза Тайжанов жауап берді. 

– Бимырза Амангелдіұлы, қазақ елі Олимпиадада жүлде алады деп үміт артып отырған спортшының бірі – Әбиба Әбужақынова. Дзюдошы ару Атырауда қашаннан бері жаттығатын еді?

– Еліміздің әр өңірінде халықаралық сайыстарда ел намысын қорғап жүрген саңлақ дзюдошылар аз емес. Соның бірі – Әбиба Әбужақынова. Қазақ жерінен тысқары елде өмірге келгенімен, жүрегі қазақ деп соғатын ұлтжандылығы менмұндалап тұрады. Ата-анасымен елге қоныс аударғаннан бері спорттағы бағы жанды деуге болады. Оны соңғы 4-5 жылдан бері атыраулық бапкер Мейрамбек Есмағамбетов жаттықтырып келеді.

Әр спортшының арманы – Олимпиада чемпионы атану. Әбибаның Олимпиадаға дейінгі жүлдесі аз емес. Ол – дзюдодан ел чемпионы. 2021 жылы Бішкекте, 2022 жылы Астанада өткен Азия чемпионатында күміс жүлдені иеленді. Екі жыл бұрын Ташкенттегі Әлем чемпионатында қола жүлдеге ие болды. Ал, 2023 жылы Португалияда жалауы желбіреген Гран-при сериясындағы турнирде жеңімпаз атанды.

Әбиба Париж Олимпиадасына осындай жетістіктерімен барып отыр. Оның дайындығына баса мән берілді. Жоғарыда айтқан додаларда бақ сынап, жүлде алудың өзі Әбибаның дайындығы мықты екенін көрсетеді.

– Әбибаның салмағында қай елдің спортшылары қарсылас болуы мүмкін?

– Олимпиадада алғашқылардың қатарында бақ сынайтын Әбиба 48 келі салмақта күреседі. Спорттың қай түрінде де жеңіл салмақта қарсыластар аз болмайды. Әбибаның салмағындағы қарсыластары осал емес. Оның үстіне Олимпиадаға кілең мықтылар іріктеледі ғой. Бірақ, біздің балуанымыз қарсыластарының айла-тәсілін, дайындық деңгейін біледі. Жаттықтырушысы Мейрамбек Есмағамбетовпен бірге Бұрыннан күресіп жүрген Бразилия, Қытай, Жапония балуандарының осал тұсын табу жолын зерттеді. Мәселен, Бішкектегі Азия чемпионатының ақтық сынында қытайлық Ли Янаннан ұтылған еді. Ал, Астанада өткен осындай чемпионатта жапон балуаны Вакана Когаға есе жіберіп алды. Жапон спортшысы солақай балуанмен күрессе, абдырап қалатынын ескереді деп ойлаймын. Өйткені, Әбиба да – солақай.

Енді Азия, Әлем чемпионаттарында кеткен есесін Олимпиада додасында қайтарып, елге жүлдемен оралатынына сенемін. Жалпы Әбиба Әбужақынова – қателік жібермейтін, тәжірибесі әбден толысып, ысылған дзюдошы. Спорттың осы түрімен 11 жасынан бері айналысатын дзюдошы қызымыздың алтын медаль алатын жөні бар. Бұл – оның басты мақсаты. Сондықтан, Әбибаны Олимпиада жүлдесінің жолашары болсын деп тілейік.

– Олимпиадада бақ сынайтын тағы бір балуан – Эсмигул Куюлова. Оның дайындығы туралы не айтасыз?

– Эсмигул да – елге оралған қандасымыз. Талабы таудай, ізденетін дзюдошымыз тек елімізге ғана емес, алыс-жақын елдерге де танылып жүр. Биыл 63 келі салмақта Азия чемпионатының қол жүлдегері атанды. Әбибаға қарағанда, халықаралық додадан алған жүлдесі аз болуы мүмкін. Алайда, шеберлігі шыңдалып келеді. Оның да Олимпиадан жүлде алатын мүмкіндігі бар. Тек аптықпай, асықпай, сабырмен күрессе ғана нәтижеге қол жеткізеді деп ойлаймын.

– Ел үміт артып отырған дзюдошыларға жергілікті жерде қандай қолдау көрсетілді?

– Қай жарысқа қатысса да алдымен спортшылардың дайындығына көңіл бөлінеді ғой. Ал, төрт жылда бір өтетін Олимпиаданың жөні бөлек. Сол себептен, Әбиба мен Эсмигулдің халықаралық рейтингте ұпай берілетін жарыстарға баруына барынша қолдау көрсетілді. Қазір Әбиба рейтингте алдыңғы орында тұр. Эсимгулдің де рейтингі көтерілді. Олимпиадаға аттанар алдында екі спортшыны Атырау облысының әкімі Серік Шәпкенов арнайы қабылдап, сәтті сапар тіледі. Облыстық дзюдо федерациясының тарапынан ұдайы қаржылай қолдау көрсетіп келеміз.

Қазақ елі Олимпиадаға қатысуға аттанған спортшылардың жеңіспен оралуына үміт артып, ең жақсы тілегін арнап отыр. «Жақсы сөз – жарым ырыс» дегендей, елдің үміті ақталып, спортшыларымыздың жүлдесі көбейгенін қалаймын.

Еске сала кетелік, бұдан бұрын Әбиба Әбужақынова басты мақсаты – Олимпиаданың финалына жетіп, алтынға таласу екенін айтқан еді.