Әбілқайыр Сқақов МӘМС-ті реформалау туралы петиция талаптарына пікір білдірді
АСТАНА. KAZINFORM – «Әлеуметтік медициналық сақтандыру қоры» коммерциялық емес акционерлік қоғамының басқарма төрағасы Әбілқайыр Сқақов МӘМС-ті реформалау туралы петиция талаптарына пікір білдірді.
Петицияның бірінші талабы бірнеше жерде жұмыс істейтін адамның тек бір айлығынан ғана МӘМС жарнасын аударатындай жүйе құру болатын.
«МӘМС жарнасына төленетін соманың жоғары шегі бар. Тіпті бірнеше жерде жұмыс істеген күннің өзінде ай сайын 17 мың теңгеден артық төлемейді. Өйткені МӘМС жарнасы алынатын ең жоғары табыс 850 мың теңге деп белгіленген», - деді қор басшысы.
Екінші талапта кәсіпкерлер табысы тоқтап тұрған кезде МӘМС жарнасын аударудан босату ұсынылған.
«Егер кәсіпкердің табысы тоқтап қалса, өзінің қызметін уақытша тоқтатуға хақылы. Қызмет тоқтатылса, салық пен МӘМС жарнасы, тиісті декларация да тоқтатылады», - деді Әбілқайыр Сқақов.
Үшінші талап әр адам өзі аударған жарнаны жинақтап, қажет болған жағдайда жақын адамына бере алу керек дегенге саяды.
«Бізде әлеуметтік медициналық сақтандыру үлгісі жұмыс істейді, яғни ынтымақты модель бар. МӘМС жарнасын басқа адамға беру немесе ұсыну қарастырылмаған. МӘМС жүйесінің негізгі қағидаты осындай. Сенің қазір аударған жарнаң қазір медициналық көмекке мұқтаж адамға жұмсалады. Ал сен медициналық көмекті қажет еткенде өзгелердің жарнасы жұмсалады. Бірақ мен петиция туралы ресми пікір білдіргім келмейді. Бұл алдын ала шешім немесе сарапшылық көзқарас болып қабылдануы мүмкін. Әр нәрсе өз уақытымен болғаны дұрыс», - деді ол.
