Африкада қазақ күресінен біріншілік өтеді

АСТАНА. ҚазАқпарат - Оңтүстік Африка Республикасының Кейптаун қаласында 18-19 мамыр күндері қазақ күресінен құрлықтық чемпионат өтеді, деп хабарлайды ҚазАқпарат тілшісі.

Бұл туралы Дүниежүзілік қазақ күресі федерациясы мәлім етті. Осымен екінші мәрте ұйымдастырылғалы отырған додаға әлемнің 15 елінен жиналған балуандар үш салмақ (70, 80, +80 кг) дәрежесі бойынша күш сынасады.

Биылғы чемпионатта төрешілерге арналған семинар да болады. Дүниежүзілік қазақ күресі федерациясының бірінші вице-президенті Серік Төкеевтің айтуынша, жиында ұйымның төрешілері африкалықтарға төл күресіміздің ережелерін үйретіп, тәжірибелерімен бөліседі.

Сондай-ақ, Серік Төкеев: «Жақын күндері Африкада ұлттық күресімізден құрлықтық чемпионат өткіземіз. Бұл - Дүниежүзілік қазақ күресі федерациясының Кейптаунда екінші рет ұйымдастырып жатқан жарысы. Бірінші чемпионат ересектер арасында 2013 жылдың 26 ақпан мен 3 наурыз аралығында болған еді. Сол кезде жарысқа Оңтүстік Африка Республикасы, Зимбабве, Ботсвана, Свазиленд, Габон мен Нигерия мемлекеттерінің балуандары қатысқан. Ал биылғы додада 6 емес, енді 15 елдің өкілдері бақ сынасады. Оның тағы бір ерекшелігі, чемпионат ерлер және әйелдер арасында өтеді. Жаңа айтқан елдердің спортшылары жарысқа тағы да қатысамыз деп белін буып отыр. Одан басқа Сейшель аралдары, Маврикий, Конго Демократиялық Республикасы, Бенин, Малави, Намибия, Уганда мен Оңтүстік Африка Республикасының Готенг, Шығыс Кейп, Солтүстік Кейп және Батыс Кейп провинциялары жеке команда болып қатысады», - деп атап өтті.