«Агата» тропикалық дауылының салдарынан 19 адам құрбан болды

АСТАНА. Мамырдың 31-і. ҚазАқпарат - Орталық Америка елдеріне жеткен «Агата» тропикалық дауылының салдарынан ең аз дегенде, 19 адам құрбан болды, деп хабарлайды «Франс Пресс» агенттігі Гватемала мен Сальвадордың өкіметіне және құтқару қызметтеріне сілтеме жасап.

«Агата» тропикалық дауылы сенбі күні Тынық мұхитта Гватемала жағалауында пайда болған, дауылға ілескен желдің жылдамдығы жексенбі күні 80 шақырым/сағатқа дейін жеткен.

Жексенбі күні Гватемала президенті Альваро Колом, апат салдарынан 13 адамның құрбан болғанын, олардың қатарында 4 баланың бар екенін мәлім етті. Тағы 24 адам із-түзсіз жоғалғандар санатында. Өкімет елдің 74,5 мыңға жуық тұрғынын қауіпсіз жерге көшіріп отыр.

Ал Сальвадорда табиғат апаты 6 адамның өмірін қиған, екі адам із-түзсіз жоғалып кеткен.

Гондурастың тИЕМПО газетінің сайтында жарияланғандай, Мексиканың оңтүстік-шығысында қауіп-қатердің жоғары деңгейі жарияланып отыр. Ал Гватемаламен шекаралас Чьяпас штатында халыққа дауылдың келе жатқаны туралы ескерту жасалды.

Дегенмен, АҚШ-тың Мұхиттану және атмосфера бойынша ұлттық басқармасының мамандары, 2010 жылы Тынық мұхиттағы дауылдар маусымы әдеттегіден тыныштау болатынын болжап отыр.