Агенттіктің 105 жылдығы: «Қазақстан тарихы Kazinform фотосуреттерінде» атты көрме ашылды
АСТАНА. KAZINFORM — Елордадағы MEGA Silk Way сауда орталығында «Қазақстан тарихы Kazinform фотосуреттерінде» атты көрме ашылды. Бұл шара Kazinform халықаралық ақпарат агенттігінің 105 жылдығына орай өткізіліп жатыр.
Көрмеде 1930 жылдардан бүгінгі күнге дейінгі қоғам мен мемлекет өмірінен сыр шертетін маңызды оқиғалар жайлы агенттік тілшілерінің бірегей фотомұрағаты, эксклюзивті фотосуреттері ұсынылған.
Кей кадрлар бұрын-соңды еш жерде жарияланбаған.
Олар ел тарихындағы бетбұрыс кезеңдерінің құнды ескерткіші саналады.
Көрме алты бөлімнен тұрады: 1928-1959 жылдардағы Қазақстан және Екінші дүниежүзілік соғыс кезі; 1960-1985 жылдардағы ірі құрылыс жобалары, қалалар мен өңірлердің экономикалық дамуы; Алматы мен Астананың соңғы 40 жылдағы шежіресі; жеке блок әлеуметтік-мәдени қайта құруларға арналған. Сондай-ақ мемлекеттің дамуына үлес қосқан көрнекті қазақстандықтардың портреттерін тамашалауға болады.
— Экспозицияда ұжымдастыру мен индустрияландырудың, Екінші дүниежүзілік соғыстың тауқыметін бастан кешірген, соғыстан кейінгі кезеңде өмір сүрген, тың жерлерді игерген, «ғасыр құрылысына» қатысқан, Тәуелсіздік таңын атырған қазақстандықтардың өмірі көрсетіледі, — деп түсіндірді Kazinform агенттігінің басқарушы директоры Нағашыбек Алдан.
Өз кезегінде MEGA Silk Way сауда орталығының директоры Қуат Әкімбаев Kazinform агенттігімен бірлескен жобаның маңыздылығын атап өтті.
— Бірегей фотосуреттер еліміздің тарихына терең бойлауға, белгісіз қаһармандар, оқиғалар мен фактілер туралы баяндайтын эксклюзивті кадрларды көруге мүмкіндік береді. Соның ішінде Қазақстанның символына айналған Алматы мен Астананың көрнекті нысандары қалай бой көтергенін бейнелейтін суреттер де бар. Мысалы, MEGA Silk Way салынғанға дейін бұл жер қандай болғанын көпшілік біле бермейді. MEGA сауда орталықтары еліміздің ірі қалаларының ландшафтын өзгертіп, көптеген ауданның дамуына серпін берді, — деді Қуат Әкімбаев.
Көрмеге барлығы 188 фотосурет қойылған. Фотокөрме 31 тамызға дейін жалғасады.
Еске салсақ, 13 тамызда еліміздегі ең көне медиаресурстарының бірі — Kazinform халықаралық ақпарат агенттігіне 105 жыл толды. Мерейтой аясында агенттіктің продюсері Қаламқас Әбуова, басқарушы директор Нағашыбек Алдан және халықаралық жаңалықтар қызметінің жетекшісі Жұлдыз Атагелдиева агенттіктің дамуы, медиакеңістіктегі рөлі мен алдағы жоспары жайлы көзқарастарын айтып берді.
