Ағылшын шабуылшысы Гарри Кейн Чемпиондар лигасында рекорд орнатты

ОРАЛ. KAZINFORM — УЕФА Чемпиондар лигасының 1/8 финалында өткен матч кезінде мюнхендік «Бавария» клубының шабуылшысы Гарри Кейн «Байер» қақпасына гол соғып, рекордтық нәтижеге қол жеткізді.

Opta Sport сайты мәлім еткендей, Г.Кейн ағылшын футболшыларынан алғаш рет УЕФА Чемпиондар лигасының бір маусымында 10 гол соқты. 

Биылғы маусымда 31 жастағы шабуылшы «Бавария» сапында барлық турнирде 36 матчқа қатысып, 32 гол соғып, 11 нәтижелі пас берді. 

Transfermarkt интернет-порталының мәліметіне қарағанда, футболшының құны шамамен 90 млн еуроға бағаланып отыр.

Леверкузенде өткен ойында «Бавария» германиялық «Байерді» 2:0 есебімен жеңді. Г.Кейн нәтижелі паспен де көзге түсті. Екінші гол авторы — Альфонсо Дэвис.

Бірінші бәсекеде де «Бавария» 3:0 есебімен басым түскен еді. Осылайша, атақты мюнхендік клуб ¼ финалға жолдама алды.

Сондай-ақ ширек финалға «ПСЖ» (Франция), «Интер» (Италия) командалары өтті.

Франциялықтар сырт алаңда ағылшындық «Ливерпуль» командасын 1:0 есебімен тізе бүктірді. Алғашқы матчта ағылшындық клуб дәл сондай есеппен жеңген еді. Сондықтан пенальти сериясында «ПСЖ» клубының бағы жанды — 4:1.

Ал италиялықтар нидерландылық «Фейеноордтан» айласын асырды — 2:1. Бірінші ойында да «Интер» 2:0 есебімен басым болған еді.

Еске сала кетейік, бұдан бұрын Чемпиондар лигасында бір ойыншысы кем «Барселонаның» сырт алаңда жеңіске жеткенін жазған болатынбыз.

Сондай-ақ «Барселона» ширек финалдың алғашқы жолдамасына ие болды.