Ақылдың мүмкіндігі шексіз: Джо Диспензаның кітабы қазақ тілінде жарық көрді
АСТАНА. KAZINFORM — Қазақ оқырманына әлемге танымал нейробиолог әрі жазушы доктор Джо Диспенза есімі бұрыннан таныс. Енді оның ең атақты еңбектерінің бірі - «Ақылдың мүмкіндігі шексіз» кітабы тұңғыш рет қазақ тілінде жарық көріп отыр. Астанада өткен тұсаукесер шарасы Meloman, Foliant және KazFeltec компанияларының бірлескен жобасы ретінде ұйымдастырылды.
— Біз бұған дейін Диспензаның «Сергек сана» атты кітабын қазақша шығардық, ол өте жақсы сатылды. Сол себепті оқырман сұранысымен «Ақылдың мүмкіндігі шексіз» кітабын аудардық. Редакциялық, беттеу, корректура жұмыстары 7-8 айға созылды. Ал демеуші табылған соң бірден басып шығардық. Алғашқы тираж — 2000 дана. Бұл еңбекте медитацияның техникасы, тыныс алу жүйесі, армандарға жету жолдары егжей-тегжейлі баяндалады. Кітапты оқып шыққан адам өз өмірін трансформациялай алады. Ешқандай тренингке бармай-ақ, өзіңізге психолог бола аласыз, — дейді Foliant баспасы Non-fiction бөлімінің аға редакторы Ляззат Кемелбаева кітаптың мазмұны мен дайындалу барысы туралы.
Оның айтуынша, келесі жылы Джо Диспензаның «Плацебо» деп аталатын тағы бір кітабын қазақша басып шығару жоспарланып отыр.
Marwin/Meloman дүкендері желісінде өтіп жатқан BOOKFEST 2025 фестивалі аясындағы іс-шара модераторы, журналист Мақсат Асылбайұлы Диспенза еңбегін ұлттық руханиятпен байланыстырды.
— Бұл кітапта баяндалатын идеялар біздің дәстүрлі дүниетаныммен үндес. Яссауиден бастап Бекет ата, Мәшһүр Жүсіп, Абай, Шәкәрімге дейін жалғасқан рухани іліммен сабақтас. Кеңес кезінде тыйым салынған бұл білім түрі біздің ата-бабалардан келе жатқан рухани тәжірибенің заманауи ғылыми жалғасы деуге болады.
Басқасу барысында Quiz ойыны ұйымдастырылып, жеңімпаздарға жаңа кітаптар сыйланды. Кеш соңында Джо Диспенза ілімінің басты элементі — медитация тәжірибесі өткізіліп, қонақтар кітап рухын өздері сезініп шықты.
Айта кетелік, бұған дейін елордада белгілі қаламгер Баянғали Әлімжановтың балаларға арналған «400 тәтті тақпақ» атты тақпақтар жинағының таныстырылымы өтті.
Камила Мүлік
