Ақмарал Әлназарова: Ұлттық жобадан 16,5 млрд теңгені үнемдедік

АСТАНА. KAZINFORM – Денсаулық сақтау министрлігі «Ауылдағы денсаулық сақтау жүйесін жаңғырту» ұлттық пилоттық жобасын іске асыру кезінде бюджеттің 16,5 млрд теңгесін үнемдеп қалған. Бұл туралы Ақмарал Әлназарова Үкімет отырысында мәлім етті.

Жоба аясында ауылдық елді мекендерде 655 медициналық-санитариялық алғашқы көмек көрсету ұйымын ашу жоспарланған болатын. Бүгінде соның 467-сі салынып біткен. Қалған 188 нысанның құрылысы биыл аяқталуы керек.

- Жобалау кезінде эталондық жобаларды қайта қолдану арқасында 2 млрд теңге, ал құрылыс жұмыстары кезінде 14,5 млрд теңге шамасында бюджет қаражаты үнемделді.

Бұл нысандардың құрылысы кезінде қолданылған заттардың 71%-ы жергілікті өнім өндірушілердің үлесіне тиесілі, - деді ведомство басшысы.

Ақмарал Әлназарова аталған жаңа нысандарға 143 медицина қызметкері керек болатынын атап өтті.

- Өңірлердің әкімдіктері қазірден бастап ауылға жаңадан келетін мамандарды тарту және оларды ұстап қалу бойынша тиісті жұмыстарды бастаулары қажет. 

655 нысанның құрылысы аяқталып, іске қосылған кезде шамамен 1 миллионға жуық ауыл тұрғыны қолжетімді медициналық-санитарлық алғашқы көмекпен қамтылады, - деді ол.

Бұған дейін Павлодар ауылдарында қайтарылған активтер есебінен амбулаториялар салынатынын жазған едік.