Ақмола облысында бір тәулікте 98 гектардан астам аумақ өртенді
АСТАНА. KAZINFORM – Ақмола облысында өткен тәулікте құрғақ шөп өртенген бірнеше жағдай тіркелді. Жалпы тілсіз жау шарпыған аумақ 98 гектардан асты, деп хабарлайды облыстық Төтенше жағдайлар департаменті.
Өрт Біржан сал, Жақсы, Ақкөл және Егіндікөл аудандарында тіркелген.
– Барлық өрт ошағы сөндірілді. Елді мекендерге қауіп төнген жоқ. Өрт шарпыған жалпы аумақ 98 гектардан асты, – деп мәлімдеді облыстық ТЖД.
Ведомствоның алдын ала мәліметінше, өрттердің шығуына тұрғындардың отпен абайсыз әрекет етуі себеп болған.
– Өңір тұрғындары мен қонақтарын өрт қауіпсіздігі ережелерін сақтауға шақырамыз, – деп ескертті Ақмола облысының ТЖД.
Айта кетейік, Экология министрлігі аптап ыстыққа байланысты елімізде өрт қаупі әлі де жоғары екенін хабарлады.
