Ақмола облысында су тасқынына қарсы жұмыстар жалғасуда
КӨКШЕТАУ. KAZINFORM – Ақмола облысында су тасқынына қарсы жұмыстар жалғасуда. Бар күш Атбасар, Аршалы аудандары мен Қосшы қаласына және Тайтөбе ауылдарында жұмылдырылуда.
Аумақтық ТЖД баспасөз қызметінің мәліметінше, облыс бойынша су тасқынына қарсы күресу үшін барлығы 700-ге жуық адам, 210 техника және 130 мотопомпа тартылған.
«Атбасар ауданында су тасқынына белсенді дайындық жалғасуда. Инертті материал салынған қаптар төселіп жатыр. Тәулігіне шамамен 1 мың текше метр қар шығарылуда. Қосшы қаласы мен Тайтөбе ауылында қорғаныш үйіндісін нығайту үшін Астана қаласынан қосымша күштер мен құралдар келді. Сондай-ақ, Аршалы ауданында су тасқынымен күресу үшін Көкшетаудағы Мәлік Ғабдуллин атындағы Азаматтық қорғау академиясының 68 курсанты пен 4 офицері аттанды. Бұл аудандарда бір тәуліктің ішінде 20 мың текше метрден астам еріген қар суы сорылды», - деді ведомстводан.
Айта кетсек, бұдан бұрын Ақмола облысында суда қалған 6 түйе құтқарылғанын жазған едік.
