Ақмола облысында 133 бас ірі қараны ұрлағандар екі ай мерзімге қамауға алынды
КӨКШЕТАУ. ҚазАқпарат - Ақмола облысында 133 бас ірі қараны ұрлаған 5 адам екі ай мерзімге қамауға алынды. Бұл туралы облыстық соттың баспасөз қызметінен хабарлады.
Баспасөз қызметінің мәліметі бойынша Ақмола облысының Еңбекшілдер аудандық соты Мамай ауылында орналасқан «КАЗ БИФ ЛТД» ЖШС-нен жалпы сомасы 82 600 930 теңгені құрайтын «Ангус» және «Герефорд» асыл тұқымды 133 бас ірі қара мал ұрлаған деген күдікпен ұсталған 26-43 жас аралығындағы 5 ақмолалықты екі ай мерзімге қамауға алуға санкция берді.
Оларға ҚР ҚК 175-бабы 4-бөлімінің «Б» тармағында көрсетілген қылмысты жасады, яғни аса ірі көлемде бөтен мүлікті ұрлаған деген айып тағылып отыр.
