Ақпараттандыру және байланыс агенттігі телекоммуникация саласындағы терминдерді аударумен айналысады
АСТАНА. Қыркүйектің 22-сі. ҚазАқпарат /Гүлнар Жандағұлова/ - ҚР Ақпараттандыру және байланыс агенттігі телекоммуникация саласындағы техникалық терминдерді аударуды өз міндетіне алмақ. Бұл туралы бүгін журналистерге берген сұхбатында агенттік төрағасының орынбасары Айдар Әріпханов айтты.
«Мысалға «Қазақтелекомда», сондай-ақ «Алтелде» өз техникалық сөздііктері бар. Олар көптеген терминдерді орыс және ағылшын тілдерінен қазақшаға аударып жүр. Алайда, бұл орайда аздаған проблемалар бар, әр компания терминдерді өзінше аударуда. Сондықтан да бірізділік жоқ», - деді ол.
Ақпараттандыру және байланыс агенттігі бұл жұмыстарды бір жүйеге түсіріп, терминдерді стандартқа келтіруді көздейді. Бұл жұмысқа ғалымдар да тартылмақ.
