АҚШ елшісі Макронға жазған хаты үшін Францияның Сыртқы істер министрлігіне шақырылды

АСТАНА. KAZINFORM – АҚШ елшісі Чарльз Кушнер Франция президенті Эмманюэль Макронға хат жазғаны үшін Сыртқы істер министрлігіне шқырылды. Хатта елші елде өршіп тұрған антисемитизмге қарсы күрес шараларының жеткілікті деңгейде тиімді болмай отырғандығын айтқан, деп хабарлайды BBC. 

Дипломат Францияға зиянын тигізіп отырған антисемитизм туралы мысалдар келтірді.

Ол сонымен қатар мәселені шешу үшін Макронмен және басқа француз көшбасшыларымен «байыпты жоспар әзірлеуге» дайын екенін мәлімдеді.

Франция СІМ елшінің сөзін қабылдауға болмайды деп отыр. Сондықтан ведомство дүйсенбі, 25 тамызда Америка елшісін шақырып, оның мәлімдемелері елшілердің мемлекеттердің ішкі істеріне араласуына рұқсат бермейтін 1961 жылғы Вена конвенциясына қайшы келеді деп мәлімдеді.

Кушнердің хаты өткен аптада Макронға хат жазған Израиль премьер-министрі Биньямин Нетаньяхудың мәлімдемелерімен үндесіп отыр. Онда ол француз көшбасшысын Палестина мемлекетін халықаралық деңгейде тануға шақыру арқылы антисемитизмді өршітті деп айыптаған.

Франция қыркүйекте Палестина мемлекетін ресми түрде мойындауды жоспарлап отыр.

- Біз Палестина мемлекетін құруға, оның өміршеңдігін қамтамасыз етуге және оның демилитаризациясын қабылдау және Израильді толық мойындау арқылы бүкіл Таяу Шығыстың қауіпсіздігіне үлес қосатынына кепілдік беруіміз керек. Бұған балама жоқ, - деп мәлімдеді Макрон.

Бұған дейін Италия премьер-министрінің орынбасары Маттео Сальвинидің президент Эмманюэль Макронға қарсы айтқан «қолайсыз мәлімдемелерінен кейін» Франция Италия елшісі Эмануэл Д’Алессандроны шақырғанын жазған болатынбыз.