АҚШ-та бен Ладеннің күйеу баласына қатысты сот басталды
АСТАНА. 9 наурыз. ҚазАқпарат - Усама бен Ладеннің күйеу баласы және «Әл-Каиданың» жетекшілерінің бірі Сүлейман әбу Гейт өз кінәсін мойындамай отыр, оған бейсенбі күні лаңкестік әрекеті үшін айып тағылған болатын, деп хабарлайды Ресей жаңалықтары агенттігі Ассошиэйтед Пресске сілтеме жасап.
Әбу Гейттің мәлімдемесін оның қорғаушысы Нью-Йорк федералдық сотына жеткізді. Прокуратура оны 2001 жылдың 11 қыркүйегіндегі лаңкестік актілерін ақтады және террористердің жаңа шабуылы жөнінде мәлімдеме жасады деп айыптап отыр.
Әбу Гейт 2 ақпан күні Анкараның қонақүйлерінің бірінде ұсталды. Оны құрықтауға Түркияның барлаушылары мен АҚШ-тың Орталық барлау қызметі (ОБҚ) бірлесіп ат салысты. АҚШ үкіметі оған «Әл-Каида» жөнінде сауал қоймақ болып жатқанда, Түркия әбу Гейтті американдықтарға беруден бас тартып, оны босатып жіберді. Алайда көп ұзамай ОБҚ Иорданияда бен Ладеннің күйеу баласын қайтып ұстады.
