АҚШ-та жасөспірім жүрек ауруын бірнеше секундта анықтайтын қосымша жасады

АСТАНА. KAZINFORM - Америкалық жасөспірім жүрек ауруын бірнеше секундта анықтай алатын жасанды интеллектке негізделген қосымша жасады, деп хабарлайды Oddity Central.

Далластың 14 жасар жасөспірімі Сиддхарт Нандьяла жүрек ауруын диагностикалауға арналған инновациялық қосымша жасап шығарды. Circadian AI деп аталатын бағдарлама смартфон микрофоны арқылы жазылған жүрек соғу дыбыстарын талдау арқылы жеті секунд ішінде жүрек-қан тамырлары патологиясын анықтауға қабілетті.

Жас өнертапқыш қазірдің өзінде Oracle және ARM компанияларының сертификатына ие жасанды интеллект бойынша ең жас маман ретінде танылды. Оның бағдарламасы АҚШ-та 15 000-нан астам және Үндістанда 700 пациентте сынақтан өтіп, 96 пайыз дәлдікпен диагноз қойды.

Технология Үндістанның Гунтур қаласындағы мемлекеттік жалпы ауруханада сынақтан өтіп, тиімділігі расталды. Хайдарабадта өткен жасанды интеллект бойынша жаһандық саммитте Сиддхарт қосымшасының өмірді сақтап қалуға болатын медициналық қызметтері шектеулі аймақтар үшін жасалғанын атап өтті.

Үндістанның Андхра-Прадеш штатының премьер-министрі жас өнертапқышпен кездескеннен кейін оның ерекше қабілетін мойындап, болашақтағы әзірлемелеріне қолдау көрсетуге уәде берді.

Жастығына қарамастан, Сиддхарт орта мектепті бітірді және қазір Даллас университетінде информатика мамандығы бойынша білім алуда.

Еске сала кетейік, елімізде мәйітті тексермей-ақ өлім себебін анықтайтын технология енгізілмек.