АҚШ-тағы PPI өсімі жаһандық нарықтағы тәуекелге қызығушылықты бәсеңдетті

АСТАНА. KAZINFORM — Шілде айында өндірушілер бағалары индексі (PPI) айлық есеппен 0,9%-ға өсті, бұл 2022 жылдың маусымынан бергі ең жоғары айлық өсім болды, деп жазды Қазақстан қаржыгерлер қауымдастығы.

Валюта нарығы

Бейсенбі күнгі валюта сауда-саттығының қорытындысы бойынша USDKZT жұбы шамалы құбылмалылық көрсетіп, 1 АҚШ доллары үшін 538,1 теңгеге дейін (+0,07 теңге) өсті. Сауда көлемі 229,5 млн долларды құрады (-46,2 млн). Жалпы алғанда бейтарап сыртқы жағдайларды ескере отырып, мұндай динамика негізінен ішкі валюта нарығындағы жағдаймен анықталды. Теңгеге қысым көрсетіп отырған ішкі факторлар қатарында импорт көлемінің өсуі, белсенді демалыс маусымы, бюджет қаражатын игерудің жеделдеуі және сыртқы қарызды өтеу/қызмет көрсету процестері атап өтіледі.

Жарияланған статистика ішінде әлеуметтік маңызы бар азық-түлік тауарлары (ӘМАТ) бағалары индексінің өткен аптада іс жүзінде өзгеріссіз қалғанын атап өткен жөн: өсім 0,1%-ды құрады.

Бүгінгі күннің басты назарында – сыртқы сауда айналымы, өндірістік әдіспен есептелген ЖІӨ және ақша агрегаттары туралы мәліметтер жарияланады.

Ақша нарығы

Жүйедегі өтімділік артықшылығының өсуі аясында ақша нарығы кірістілігі әртүрлі бағыттағы динамиканы көрсетуді жалғастыруда. TONIA мөлшерлемесі 15,50% деңгейінде сақталса, SWAP-1D кірістілігі 11,32%-дан 11,11%-ға дейін төмендеді. Сауда-саттықтың жалпы көлемі 664,5 млрд теңгеге дейін өсті (+112,9 млрд). Сонымен қатар, Ұлттық банктің депозиттік аукционына деген сұраныс 1,4 трлн теңгеге дейін көтеріліп (+188,3 млрд), толығымен 16,5% жылдық мөлшерлеме бойынша қанағаттандырылды. Ұлттық Банктің операциялары бойынша ашық позиция 8,2 трлн теңгеге дейін ұлғайды.

Қор нарығы

Бейсенбі күні KASE индексі 1,2%-ға сенімді түрде өсіп, тамыз айының басынан бергі рекордтық деңгей – 6 830 пунктке жетті. Индекстің өсуіне ең үлкен үлесті БЦК акциялары (+5,8%), Халық Банкінің қағаздары (+1,3%) және Қазатомпром (+1,3%) қосты, бұл Air Astana акцияларының төмендеуінен (-1,2%) болған қысымды теңестірді. Күндізгі динамика банк секторы мен жекелеген шикізат эмитенттері бойынша сатып алушылар белсенділігінің басым екенін көрсетіп, сауда айналымының артуы аясында нарықтың жалпы өсу үрдісін қолдады.

Мұнай

Мұнай бағасы 1,8%-ға өсіп, барреліне 66,8 долларға дейін жетті. Бұл өсім АҚШ Президенті Дональд Трамп пен Ресей Президенті Владимир Путиннің бүгінгі кездесуінің алдында орын алды. Ақ үйдің баспасөз хатшысы Кэролайн Левитт бейсенбі күні хабарлағандай, Аляскада өтетін келіссөздерден кейін тараптар бірлескен баспасөз конференциясын өткізеді. Сарапшылар атап өткендей, Украина мәселесіне қатысты өтетін кездесу қарсаңында нарық қатысушылары сақтық танытып отыр. Олар бұл кездесу Ресей шикізатына қатысты санкциялардың жұмсаруы немесе керісінше, сатып алушыларға қарсы шектеулердің күшеюіне әкеледі деп қауіптенеді.

Тәуекел активтер

АҚШ-тың биржалық индекстері өндірушілер бағалары индексінің (PPI) қолайсыз деректері жарияланғаннан кейін -0,03% бен +0,03% аралығында шамалы тербеліс көрсетті. Бұл деректер қыркүйек айында мөлшерлемелерді бірнеше рет төмендету туралы жоғары күтулерді салқындатты. Шілде айында өндірушілер бағалары индексі 0,9%-ға өсті, ал Dow Jones болжамы 0,2% болған еді. Бұл – 2022 жылдың маусымынан бергі ең үлкен айлық өсім. Азық-түлік пен энергия ресурстарын есептемегенде, базалық PPI да 0,9%-ға өсті (күтілгені – 0,3%). Ал азық-түлік, энергия және сауда қызметтерін есептемейтін көрсеткіш 0,6%-ға артты, бұл – 2022 жылдың наурызынан бергі ең жоғары мән.

PPI индексіне тұтыну бағалары индексіне (CPI) қарағанда аз назар аударылғанымен, ол өндірістің аралық кезеңдеріндегі баға өзгерістері туралы маңызды ақпарат береді. Бұл көрсеткіштер АҚШ Сауда министрлігінің жеке тұтыну шығындары индексін (PCE) есептеу негізін құрайды – бұл ФРЖ инфляцияны болжауда басшылыққа алатын негізгі индикатор. Жаңартылған мәліметтер осы айдың соңында жарияланады.

Қорғаушы активтер

Алтын бағасы трой унциясына 3 381 долларға дейін төмендеді (-0,8%), ал АҚШ-тың 10 жылдық қазынашылық облигацияларының кірістілігі 4,24%-дан 4,29%-ға өсті. Доллар индексі 98,3 пунктке дейін төмендеді (+0,4%). Қорғаушы активтердің бұл динамикасы АҚШ-тағы өндірушілер инфляциясының қызып кеткен деректеріне нарықтардың реакциясын көрсетеді. Бұл деректер ФРЖ-ның жоғары мөлшерлемелерді ұзақ уақыт сақтап қалуы мүмкін деген күтулерді күшейтті.

Ал қор биржасында доллар бағамы қайта қымбаттады.