Ақтау - Түркі әлемінің мәдени астанасы: Арғықазақ мифологиясына құрылған «Суын айғыр» ауылы ашылды
АҚТАУ. KAZINFORM – «Суын айғыр» ауылы Маңғыстау ауданының атынан құрылды. Көрмеге мифолог ғалым Серікбол Қондыбайдың мемориалдық музейінің негізгі жәдігерлері қойылған.
Ұйымдастырушылар қазақ мифологиясы арқылы халқымыздың сан ғасырлық тұрмыс-тіршілігін көрсетуді көздейді.
Серікбол Қондыбай атындағы мемориалдық музейдің директоры Римма Бердиеваның айтуынша, көрме «Арғықазақ мифологиясы» кітабы желісінде жасақталған. Миф – ойдан шығарылған дүние емес, белгілі бір уақытта, тарихта, мәдениетте, қоғамда болған оқиғалар желісі.
- Маңғыстаудың аңыздары мен мифтерін ғылыми негізде зерттеген, қазақ мифологиясының жаңа қырларын ашып, бұл өңірдің құпия сырларын әлемге танытқан ғалым - Серікбол Қондыбайдың зерттеулерінен тарихи-ғылыми деректерді алып келдік. Киіз үйде зерттеу кітаптары мен кейіпкерлерін таныстырамыз, - дейді музей директоры Римма Бердиева.
Көрмеде қонақтар «Ер Төстік» ертегісіндегі Жылан Бапыхан, яғни жыландардың патшалығымен танысады. Бұл - түркiлердiң «Ергенеқон» аңызы бойынша жасалған экспозиция. «Ұмай ана», «Отана» жас аналар мен сәбилердің тәңір иесі деп түсініп, сыйынғанын және жарылқаушысы болғанын жеткізеді.
Бұған дейін, Ақтауда Түркі әлемінің мәдени астанасы жылының ашылу салтанасы аясында 25 мың адам жиналатын ғаламат шоу өтетіні туралы жазған болатынбыз
