Ақтауда теңіз жағалауына салынған заңсыз айлақ демонтаждалып жатыр
АҚТАУ. KAZINFORM — Ақтауда 4А шағын ауданындағы теңіз жағалауы аумағында заңсыз салынған қайық айлағы анықталды.
Ақтау қаласы әкімдігі баспасөз қызметінің мәліметінше, жағалау аумағында жүргізілген мониторинг және бақылау жұмыстары барысында кәсіпкердің тиісті рұқсат құжаттарынсыз қайық айлағын орнатқаны белгілі болған.
— Анықталған заң бұзуға байланысты кәсіпкерге қолданыстағы заңнама талаптарына сәйкес ескерту жасалып, кемшіліктерді белгіленген мерзімде жою туралы нұсқама берілді. Сондай-ақ нысан орналасқан аумақты бастапқы қалпына келтіру, заңсыз орнатылған құрылымдарды демонтаждау, жағалау белдеуін абаттандыру және санитарлық талаптарды сақтау міндеттелді, — дейді Ақтау қаласы әкімдігі баспасөз қызметі.
Қазіргі таңда аталған аумақта айлақты бұзу жұмыстары басталған.
Осы оқиғадан кейін қала әкімдігі жер учаскелерін, жағалау аймақтарын және қоғамдық кеңістіктерді заңсыз игеруге, сондай-ақ рұқсатсыз құрылыс жұмыстарын жүргізуге жол берілмейтінін еске салды. Ал, заң талаптарын бұзғандарға тиісті әкімшілік шаралар қолданылмақ.
Бұған дейін, Ақтауда жеткіншек жағажайдағы батпаққа батып кете жаздаған болатын.
