Ақтаудағы ауқымды гала-концерт басталды
АҚТАУ. KAZINFORM – Ақтау қаласында «Ақтау – Түркі әлемінің мәдени астанасы» гала-концертінің ашылу салтанаты өтті.
Іс-шараны құттықтау сөзімен ашқан министр Аида Балаева бүгін тек еліміз үшін ғана емес, күллі түркі дүниесі үшін аса маңызды тарихи оқиға болып жатқанын айтты. Ол сондай-ақ көпшілікті Ақтау қаласының түркі әлемінің мәдени астанасы мәртебесіне ие болуымен құттықтап, Мемлекет басшысының арнайы құттықтауын жеткізді.
Өз кезегінде халықаралық шараның Ақтауда өтуіне ұйытқы болған ТҮРКСОЙ халықаралық ұйымының Бас хатшысы Сұлтан Раев шараның жоғары деңгейде ұйымдастырылғанын атап өтті. Сондай-ақ қазақ елінің ұлтаралық келісім мен бірліктің мекені екенін, Түркі әлемінің мәдени астанасы жылын Қазақстанда оның ішінде, Ақтау қаласында өткізудің маңызына тоқталды.
– Қазақстан – қазір ұлттық рухы берік, саяси жүйесі тұрақты, халықаралық аренадағы беделі зор, қуатты мемлекет. Орта Азияның, түгел Түркі дүниесінің жарқыраған жұлдызы – Қазақстан. Қазақ халқы – татулыққа ұйыған, жастары жасампаздыққа ұмтылған ел. Күллі әлем таныған, құрметтеп төріне оздырған беделді мемлекет. ТҮРКСОЙ Ақтауды 2025 жылдың мәдени астанасы етіп тектен тек жариялаған жоқ. Биыл түркі әлемінің орталығында түркі ағайындар мәдениет пен әдебиеттің, салт-дәстүр мен тарихтың «түтінін түтетіп», қоян-қолтық араласып, бір-бірімен жақынырақ танысатын болады, - деді ол.
Сұлтан Раев биыл Қазақ мифологиясын зерттеуге үлкен үлес қосқан ғалым Серікбол Қоңдыбайдың шығармаларын түрік тіліне аударып, ТҮРКСОЙ тарапынан Түркиядан кітап етіп шығаруды қолға алатынын хабарлады.
Ал, Маңғыстау облысының әкімі Нұрдәулет Қилыбай мәртелі меймандарға қош келдің айтып, түркі жұртын біріктірудің маңызына тоқталды.
– Мемлекет басшысы Қасым-Жомарт Кемелұлы Тоқаев – түркі әлемін XXI ғасырда маңызды экономикалық және мәдени кеңістікке айналдыру – негізгі мақсат екенін айтқан болатын. Бауырлас елдердің басшылары түркі жұртын біріктіруге баса мән беріп келеді. Бүгінгі кәрі Каспийдің жағасындағы ақмаржан – Ақтау шаһарында бас қосуымыз – осының дәлелі. Түркі дүниесіне еңбек сіңірген көрнекті мемлекет және қоғам қайраткері, Әбіш Кекілбайұлының сөзімен айтсам «Маңғыстау – Тарих пен табиғаттың бірге толғаған тамаша дастаны, бірге салған таңғажайып суреті, бірге шерткен тағылымды шежіресі!» Ендеше, аңыздар мен абыздардың, әулиелер мен батырлардың елі – Маңғыстауға келіңіздер, - деді облыс әкімі.
Еске сала кетейік, Ақтауда 25 мың адам жиналатын ғаламат шоу өтетінін, концертте Димаш Құдайбергеннің өнер көрсететінін жазған едік.
