Ақтаудағы сарбаздың өлімі: Қасақана кісі өлтіру фактісі бойынша сотқа дейінгі тергеу басталды

АСТАНА. KAZINFORM – Батыс өңірлік әскери-тергеу басқармасы қасақана кісі өлтіру фактісі бойынша сотқа дейінгі тергеуді бастады, деп хабарлады Бас әскери прокуратурасының баспасөз қызметі.

«2024 жылғы 7 қыркүйекте сағат 17:10 шамасында Ақтау қаласындағы ҚР ҚМ әскери бөлімдерінің бірінің взвод командирі «Оймаша» полигонының аумағында ПМ табельдік тапаншасынан қатардағы Б-ға оқ атып, соңғысы қайтыс болды. Сол күні Батыс өңірлік әскери-тергеу басқармасы қасақана кісі өлтіру фактісі бойынша сотқа дейінгі тергеуді бастады (ҚК 99-бабының 1-бөлігі)»,-делінген хабарламада.

Тергеу органы күдіктіні ҚПК-нің 128-бабы тәртібімен ұстады және Ақтау қаласының уақытша ұстау изоляторына қамауға алды.

Қажетті кешенді тергеу амалдары жүргізілуде, қылмыстың себептері мен өзге де мән-жайлар анықталуда.

Іс бойынша процестік прокурор тағайындалды.

Тергеу барысы Бас әскери прокуратураның ерекше бақылауына алынды.

«Қылмыстық процестік кодекстің 201-бабына сәйкес басқа мәлімет жарияланбайды»,-делінген Бас әскери прокуратураның хабарламасында.

Осыған дейін Ақтауда оқ жарақатын алған сарбаздың мерт болғанын хабарладық.

Қорғаныс министрлігі Ақтауда мерт болған сарбаздың ісі бойынша арнайы комиссия құрды.