Ақтаулық жүргізуші оқушыны қағып, оқиға орнынан бой тасалады
АСТАНА. ҚазАқпарат - Мұнайлы ауданындағы Басқұдық ауылында ПАЗ маркілі жолаушылар автобусының жүргізушісі мектеп оқушысын қағып кетіп, оқиға орнынан бой тасалады. Бұл туралы Маңғыстау облыстық ішкі істер департаментінің баспасөз қызметінен хабарланды.
Жол-көлік оқиғасы 10 қазан күні сағат 21-00-де жол бойында орналасқан «Басқұдық» дүкенінің жанында болды, деп жазады Lada.kz.
«Жүргізуші оқиға орнынан бой тасалады. Ал, көлік қаққан бала алған жарақаттарынан оқиға болған жерде көз жұмды. Арнайы жүргізілген жедел-іздестіру шараларының барысында жүргізуші табылды, ол 1970 жылы туған Өзбекстан азаматы болып шықты. Ол тергеу оқшаулағышына жеткізілді. Ал, автобус айып тұрағына қойылды»,-деп хабарлады Маңғыстау облыстық ішкі істер департаменті баспасөз қызметінің жетекшісі Жазира Әбіл.
Аталған факті бойынша, байқаусызда адам өліміне алып келген жол ережесін бұзу және жол-көлік оқиғасы болған жерді тастап кету әрекеттері бойынша екі қылмыстық іс қозғалды.
