Ақтөбе қаласының әкімі тағайындалды
ТӨБЕ. 26 шілде. ҚазАқпарат /Самал Ендібаева/ - Бүгін қалалық мәслихаттың сессиясында облыс әкімі Архимед Мұхамбетов депутаттарға Ақтөбе қаласының жаңа әкімі, 50 жастағы Нұрмұхамбет Әбдібековты таныстырды. Қала әкімінің кандидатурасын депутаттар бірауыздан қолдады.
Нұрмұхамбет Әбдібеков 1984 жылы Мәскеу тау-кен инстиутын тау-кен инженері мамандығы бойынша тәмамдап шыққан. Техника ғылымдарының кандидаты. Еңбек жолын 1984 жылы Шилісай фосфорит кенішінің шебері, кейін тау-кен цехының бастығы болып бастаған.
1996 жылдан бастап мемлекеттік қызметке араласты, Ақтөбе, Атырау облыстарының әкімдіктерінде бірқатар басшылық қызметтерге тағайындалған. 2004-2007 жылдар аралығында Ақтөбе облысы әкімінің орынбасары болған. Осы қызметке тағайындалмастан бұрын 2010 жылдан бастап ҚР Индустрия және сауда вице-министрі болып жұмыс істеген.
Облыс әкімі Архимед Мұхамбетов Нұрмұхамбет Әбдібековтың көптеген салалар бойынша тәжірибесі мол екенін және алдағы міндеттерді орындай алатынына сенімді екенін жеткізді.
