Ақтөбе облысында екі «жайлы мектепте» оқу басталды
АҚТӨБЕ. KAZINFORM — Екеуі де облыс орталығында. Бірі — Ақжар-2 елді мекенінде, екіншісі — Есет батыр тұрғын алабында орналасқан, деп хабарлайды Ақтөбе облысының әкімдігі.
Өңір басшысы Асхат Шахаров жаңа «жайлы мектептердің» жай-күйімен танысып, мұғалімдермен және оқушылардың ата-аналармен кездесіп, балалардың заманауи білім алу мүмкіндіктерін бағамдады.
Ақжардағы жаңа № 79 жалпы білім беретін орта мектеп — Мемлекет басшысы Қасым-Жомарт Тоқаевтың елімізде білім алу үшін сапалы жағдай жасау туралы тапсырмасын іске асырудың жарқын үлгісі.
Мектеп директорының м. а. Мәншүк Досжанованың айтуынша, оқу мекемесі 300 орынға шақталған, заманауи оқу кабинеттер, зертханалармен және IT құзыреттілікті дамыту үшін арнайы аймақтармен жабдықталған. Мұнда екі компьютерлік кабинет және робототехника сыныбы, STEM-зертхана, шеберханалар, заманауи кітапхана, оқу залы, жайлы коворкинг алаңдары мен қозғалыссыз және белсенді ойындарға арналған жабдықталған алаңдар, сондай-ақ спорт және акт залдары бар.
Мектеп оқушылардың білімі мен шығармашылығын дамыту үшін барлық қажетті заттармен жабдықталған. Оның ішінде ерекше білім беру қажеттіліктері бар балаларға жағдай жасауға көңіл бөлінген.
Төртінші тоқсанға 325 бала қабылданды, оқыту екі ауысымда жүргізіледі.
Облыс әкімі оқушылардың ата-аналарымен кездесуде осындай заманауи мектептердің құрылысы өңірдегі білім беру сапасын жақсартудағы маңызды қадам екенін атап өтті.
— Президент тапсырмасы аясында біз білім беру инфрақұрылымын белсенді дамытып жатырмыз. Жайлы мектептер — бұл жаңа ғимараттар ғана емес, балаларымыздың дамуына барлық жағдай жасалған заманауи білім беру орталықтары. Оқушыларға сәттілік тілеймін, осындай жайлы және заманауи орта ұсынған барлық мүмкіндікті тиімді пайдаланғандары жөн. Биыл облысымызда 11 400 оқушыға арналған тағы 13 жаңа жайлы мектеп ашылады. Әрбір оқу орны ең жоғары стандарттарға сай болуы үшін біз осы бағытта одан әрі жұмыс істейміз, — деп атап өтті облыс әкімі.
Оқушылардың ата-аналары алғыс сөздерін де жеткізді.
— Бұл — бізге нағыз мереке. Ақжарда тағы бір мектеп ашылды. Менің немерелерім мен жиендерім осында оқиды. Мектеп өте керемет, өте әдемі. Мұнда домбыра сыныбы, қыздар мен ұлдарға арналған шеберханалар бар. Қазір балаларға ең жақсысы ғана ұсынылады, ата-ана ретінде балаларымыздың жайлы және заманауи жағдайда оқитынына сенімді бола аламыз. Мұны жүзеге асырған барша азаматтарға үлкен рахмет, — деді Айнагүл Сәбитеева.
Мырзабай Бабашев осы мектепті ашуға көмектескендерге ризашылығын білдірді.
— Мектеп өте жақсы. Сапалы білім алу үшін қажет нәрсенің бәрі бар — робототехника кабинеті, зертханалар, акт залы, спорт залы. Мен немерелерімнің осындай жақсы жағдайда оқып, барлық бағытта дамитынына өте қуаныштымын. Осы мектепті ашуға көмектескен жандарға ризашылығымды білдіремін, — деді ол.
Адам көп шоғырланған тұрғын алаптардың бірі — Есет батырда бой көтерген 2000 орындық № 82 жалпы білім беретін орта мектеп те заманауи жабдықтармен қамтамасыз етіліп, әртүрлі жастағы оқушыларға бейімделген. Мұнда 55 оқу кабинеті бар, оның ішінде 28 бастауыш сынып кабинеті, 7 мектепалды даярлық сыныбы, сондай-ақ химия, физика, биология кабинеттері, ағылшын тілі, IT, робототехника және STEM зертханалары қарастырылған. Оқу блоктары ғылым, технология, инженерия және математика пәндерін тереңдетіп оқытуға мүмкіндік береді. Сонымен қатар, 440 балаға арналған асхана да жұмыс істейді.
Оқу кабинеттерінен бөлек, мектеп заманауи кітапхана, оқу залы, коворкинг-аймақтар және балалардың белсенді демалуына арналған ойын алаңдарымен жабдықталған. Ерекше білім беру қажеттіліктері бар балалар үшін арнайы кабинеттер мен қолжетімді орта жасалды.
— Мемлекетіміздің болашағы жан-жақты дамыған, дені сау және мәдениетті азаматтарға байланысты. Сондықтан елімізде балаларымыздың сапалы білім алуына айырықша көңіл бөлініп жатыр. Әрбір бала, тұрғылықты жеріне қарамастан, жоғары деңгейде білім алу мүмкіндігіне ие болуы маңызды. Бұл — әрбір жайлы мектептің басты мақсаты. Мұндай білім ордалары оқушылардың барлық қажеттілігіне сай. Осындай мектеп өңірдің білім беру инфрақұрылымын нығайту жолындағы маңызды қадам болатынына сенімдіміз. Болашақта да білім беру жүйесін дамытып, әрбір баланың өз әлеуетін жүзеге асыруына және ел дамуына үлес қосуына жағдай жасаймыз, — деп атап өтті өңір басшысы ата-аналармен кездесуде.
Жаңа мектепті аралап шыққан Есет батыр тұрғын алабы тұрғындарының да қуанышында шек жоқ. Білім ордасының ашылуы оқушы орындарының тапшылығы мәселесін шешті.
— Осындай керемет мектептің салынғанына өте қуаныштымын. Бұл — ата-аналар үшін де, мұғалімдер үшін де, ең бастысы — балалар үшін нағыз арман мектебі. Білім саласында көпжылдық тәжірибем бар, бірақ дәл осындай деңгейдегі оқу орнын алғаш рет көріп тұрмын. Мұнда балаларға ерекше қамқорлықпен жағдай қарастырылған: заманауи кабинеттер, жайлы оқу және демалыс ортасы. Ата-аналарға айтарым — мұғалімдермен бірге жұмыс істеңіздер, балаларыңызды қолдап, олардың өсуіне және дамуына көмектесіңіздер. Сонда ғана жоғары нәтижелерге қол жеткізе аламыз. Ал балаларға айтарым — мектептеріңді қадірлеңдер, жасалған мүмкіндіктерді бағалаңдар. Бұл мектеп — білім мен даму орталығы. Мектептің салынуына атсалысқан барша жанға алғысымды білдіремін, — деді педагогика саласының ардагері Жания Мұхамбетова.
Есет батыр тұрғын алабының тұрғыны Қайрат Назаров мұндай мектептің салынуы балалары үшін үлкен қуаныш екенін айтты.
— Осы тамаша мектептің бой көтеруіне үлес қосқан барша жанға рахметімді айтамын. Ата-ана ретінде балаларымыздың осындай тамаша жағдайда оқып, сапалы білім алатынына қуаныштымыз. Мұндай мектептің салынуы — біз үшін және балаларымыз үшін үлкен қуаныш!, — деді Назаров.
Бұған дейін Ақтөбедегі түзету кабинеттерінде ерекше қажеттілігі балалардың құқығы бұзылғаны мәлім болды.
