Ақтөбе облысында МИ-8 тікұшағы апатты жағдайда қонды

АСТАНА. ҚазАқпарат - Ақтөбе облысының Шалқар ауданының тұрғылықты пунктіне жақын маңда «Евразия-Эйр» компаниясына тиесілі МИ-8 тікұшағы апатты жағдайда қонды, деп хабарлайды «ҚазАқпарат» ХАА тілшісі.

Бұл туралы ҚР Инвестициялар және даму министрлігі Азаматтық авиация комитетінен хабарлайды.

«Зардап шеккендер жоқ. Оқиға орнынан құрамында 3 адам бар тікұшақ экипажы мен бір жолаушы автокөлікпен Бозой станциясына жеткізілді», - деп хабарлайды ведомстводан.

Қазіргі уақытта ҚР Инвестициялар және даму министрлігінің Көлік оқиғалары мен оқыс оқиғаларды тексеру департаменті аталған іс бойынша тергеу амалдарын жүргізіп жатыр.