Ақтөбе облысында жұмысқа тұрғызамын деп 900 мың теңге алған алаяқ ұсталды

АСТАНА. ҚазАқпарат - Көліктегі ІІД-нің ұйымдасқан қылмыспен күрес басқармасы қызметкерлері Ақтөбе станциясындағы Ішкі істер желілік басқармасы қызметкерлерімен бірлескен жедел-іздестіру шарасын өткізу барысында ҚР ҚК 190-бабы (Алаяқтық) бойынша қарастырылған қылмысты жасағаны үшін тепловоз машинисті болып қызмет ететін Қандыағаш қаласының 43 жастағы тұрғынын ұстады.

Кеше Қандыағаш станциясындағы желілік полиция бөліміне 31 жастағы азамат арызданған болатын. Ол Қандыағаш станциясының теміржол вокзалының 2-қабатында Ерболат есімді азаматтың оның сеніміне кіріп, Шалқар станциясындағы локомотивтік депоға машинист көмекшісі ретінде жұмысқа тұруына ықпал етемін деп уәде беріп, 900 мың теңгесін алып кеткен.

Күдікті өз кінәсін мойындап отыр. Қазір сотқа дейінгі тергеу амалдары жүргізілуде.

Естеріңізге сала кетсек, алаяқтық бір мың айлық есептік көрсеткіш көлеміндегі айыппұлмен әлде осы көлемдегі түзеу жұмыстарымен немесе екі жылға дейінгі мерзімге бас бостандығын шектеумен немесе мүлкін тәркілеумен қатар осы мерзімге бас бостандығынан айырумен жазаланады, деп хабарлайды Көліктегі ІІД-нің баспасөз қызметінен.