Ақтөбе облысының әділет департаментінде СМС-портал жұмыс істей бастады
АҚТӨБЕ. Тамыздың 11-і. ҚазАқпарат /Мирал Жармұхамбетов/ - Ақтөбе облысының әділет департаментінде «СМС-портал» жүйесі жұмыс істей бастады. Бұл - халықтың ақпараттарды жедел және толымды алуы мақсатында әділет органдары көрсететін мемлекеттік қызметті әрі қарай жетілдіру жөніндегі тағы бір шара.
Аталмыш жүйе алғаш рет енгізілуде және оның жұмыс барысы төмендегідей: сауал қойылған СМС-хабар порталға 8-701-519-60-19 телефон нөміріне жіберіледі. Ал порталға келіп түсетін барлық сауалды оператордың компьютері қабылдап алады, әрі қарай ол сауал әділет органының тиісті бөлімшесіне жіберіледі. Сауалдың мазмұнына байланысты, жауап 1 - 7 күннің ішінде беріледі.
Өз СМС-сауалына жауап алу үшін азамат 8 (7132) 56-20-70 телефонымен әділет департаменті анықтама қызметінің саll-орталығы операторына қоңырау шалып, сауал жіберілген ұялы телефонның нөмірін айтса болды. Сондай-ақ жауаптармен департаменттің - www.аdiletaktobe.kz мекен-жайдағы веб-сайтына кіріп, танысуға болады.
