Ақтөбеде «Таныстыруға рұқсат етіңіз» акциясы өтуде
АСТАНА. 14 маусым. ҚазАқпарат - Ақтөбе облыстық ішкі істер департаменті 15 мамыр мен 15 тамыз аралығында учаскелік полиция инспекторларының тұрғындармен қарым-қатынасын жақсарту мақсатында «Таныстыруға рұқсат етіңіз» акциясын өткізуде, деп хабарлады ведомствоның баспасөз қызметінен.
Акция өткізілген осы уақыт аралығында тұрмысы төмен 50 отбасы анықталып, есепке қойылса, көші-қон заңын бұзған 150-ден астам тұлға анықталған және олар көші-қон желісі бойынша әкімшілік жауапкершілікке тартылған.
Шара барысында жалға берілетін пәтерлерге де басты назар аударылуда. Анықталған пәтерлер саны - 67. Ал жалға берушілерге қолданыстағы заңнамаға сәйкес шара қолдану үшін салық органдарына тиісті ақпараттар жолданады.
Сондай-ақ, акция аясында учаскелік полиция пунктерінде ІІО бөліністері басшыларының тұрғындарды қабылдауы ұйымдастырылуда.
