«Ақжайық» өз алаңында «Сұңқардан» ұтылып қалды
ОРАЛ. 4 қазан. ҚазАқпарат /Елжан Ералы/ - Оралдың «Ақжайығы» кеше өз алаңында футболдан Қазақстан чемпионаты бірінші лигасында көш бастап келе жатқан Қаскелеңнің «Сұңқарын» қабылдады.
Бірінші таймда «Ақжайықтың» сұрмергені, сербиялық ойыншы Миленко Рашкович есеп ашқанымен, алаң иелері бұл басымдылықты ұстап тұра алмады. Екінші таймда қазір «Сұңқардың» құрамында ойнап жүрген белгілі шабуылшы Әлібек Бөлешев екі мәрте мергендік танытып, өз командасына жеңіс әперді.
Бұл турдан кейін «Ақжайық» премьер-лигадан біржола үмітін үзді. «Сұңқардан» кейінгі екінші орынды Көкшетаудың «Оқжетпесі» иеленді.
