Алан Құрманғалиев үстел теннисінен Қытайдағы турнирдің қола жүлдегері атанды

АСТАНА. KAZINFORM - Үстел теннисінен Қазақстан құрамасының өкілі Алан Құрманғалиев Қытайдың Бейжің қаласында өтіп жатқан China Youth Smash турнирінде қола жүлдеге ие болды, деп хабарлайды ҚР Ұлттық олмпиадалық комитетінің баспасөз қызметі.

Алан жарыстың жартылай финалына дейін жетіп, жастар арасында екі дүркін әлем чемпионы қытайлық Вен Жуйбомен кездесті.

Бұл матч 4:0 есебімен қарсыластың пайдасына аяқталды. Осылайша Құрманғалиев турнирді қола медальмен аяқтады.

Айта кетейік, 1/4 финалда қазақстандық спортшы жастар арасында әлем чемпионы Ли Хеченді 4:3 есебімен жеңген болатын.

Осыған дейін Дана Әбдірованың дзюдодан жастар арасында әлем чемпионатында күміс алғаны туралы жаздық.