Алдағы екі жыл - Қысқы Азия ойындарына дайындық мерзімі
АСТАНА. Шілденің 2-сі. ҚазАқпарат /Райхан Қоңыр/ - Алдағы екі жыл 2011 жылы Астана мен Алматыда өтетін Қысқы Азия ойындарына дайындық жылы болып табылады,
деп хабарлайды ҚазАқпарат.
Мұндай ауқымды шара ең жас қала Астанада ғана емес, ел аумағында тұңғыш рет өткізілмек. Міне, сол үшін ұйымдастырушылар басты-басты екі шараға назар аудармақ. Біріншісі - инфрақұрылым саласын жетілдіру болса, екіншісі - ұйымдастырушылық шараларды тиімді атқару болып табылады. Бастысы - спорттық бағыттағы нысандарды, атап айтқанда, жабық коньки стадионы, мұз айдыны және «Олимпиадалық резерв дайындау жөніндегі республикалық орталық», қонақүй кешенін салу, сондай-ақ «Қазақстан» Спорт сарайын жөндеуден өткізу шараларын жүзеге асыру міндеті тұр.
Бүгінде осы бағыттағы іс-шаралар қолға алына бастады. Бұл жұмыстарды қаржымен қамту 2009 - 2010 жылы тәмамдалмақ.
Дайындық шарасының ұйымдастыру жөніндегі екінші бөлігі бойынша жұмыстар жүргізіле бастады. Өйткені Азиада ойындарын өткізу қала тіршілігінің барлық саласын жан-жақты қамтымақ. Тұрмыстық деңгейдегі тірліктен бастап, елорданың да, елдің де абыройын асыру - еліміздің саяси келбетін түзумен пара-пар. Сонымен қатар, жарыс өткізілетін орындардың арнайы стандарттар мен нормаларға сай болуының мәні зор.
