Александр Бублик Мюнхен турниріне жолдама алды

АСТАНА. KAZINFORM — Қазақстанның бірінші, әлемнің 76-ракеткасы Мюнхен (Германия) ATP 500 турнирінің іріктеу сайысын сәтті аяқтады.

Қазақстандық теннисші іріктеу сайыстарының финалында дүниежүзілік рейтингіде 546-орында тұрған германиялық, 17 жастағы Диего Дедура-Паломеромен шеберлік байқасты. Екі сет те 6:3 есебімен Бубликтің пайдасына шешілді.

Бір сағаттан астам уақытқа созылған бәсекеде А.Бублик 2 эйспен бірге 10 брейк-пойнттың бесеуін өз есебіне жазды. Германиялық спортшы 2 брейкпен шектелді. Осылайша, Александр Бублик 14-20 сәуір аралығында өтетін негізгі жарысқа жолдама алды.

Тағы бір қазақстандық Александр Шевченко іріктеу сайыстарының финалында хорватиялық Бора Гойодан жеңіліп қалды 4:6, 4:6.

Еске сала кетейік, бұдан бұрын теннистен әлем чемпионатында Қазақстан жасөспірімдер құрамасының іріктеу турнирінің финалына шыққанын жазған болатынбыз.