Әлемдік БАҚ-тағы Қазақстан: Словениямен байланыс, экспорт келісімі мен Жеңіс шеруі
АСТАНА. KAZINFORM – Әдеттегідей жаһандағы ақпарат таратушы интернет-басылымдар елдегі көп жайға үңілді. Апта ішіндегі Словения президентінің сапары, ҚХР-мен жасалған экономикалық келісім айтылыпты. Жеңістің 80 жылдығына арналған әскери шеруден не күтетіні, елде Наурыз мерекесі қалай тойланғаны хабарланған. Толығырақ Kazinform тілшісінің шолуынан оқыңыз.
Anadolu: Қазақстан мен Словения жан-жақты серіктестікке бет алды
Словения – Қазақстанның Еуропалық Одақтағы маңызды серіктесі. Елдер арасындағы қарым-қатынас қарқынды дамып жатыр. Бұл ойды Словения президентінің Қазақстанға ресми сапары кезінде Қасым-Жомарт Тоқаев та қайталаған болатын. Айтуынша, былтыр Любляна қаласында Қазақстан Елшілігінің ашылуы – берік достықтың дәлелі. Президент сөзін Anadolu ақпарат агенттігі таратты.
Президенттер екіжақты сауда-экономикалық және инвестициялық байланыстарды арттыруға келісті. Қазір қос мемлекет фармацевтика, жаңартылатын энергия, инженерия, телекоммуникация бағыттарында маңызды жобаларды жүзеге асырып жатыр. Қасым-Жомарт Тоқаев Қазақстанда осы салаларда 20-ға жуық словен компаниясы табысты жұмыс істеп жатқанына тоқталып, экономикалық байланыстардың ауқымын одан әрі кеңейтудің маңызын атап өтті.
– Тау-кен, жасыл энергетика, атом өнеркәсібі, цифрландыру және инновация, денсаулық сақтау, туризм салаларында тың жобаларды жүзеге асыруға келістік. Қолда бар мүмкіндікті тиімді пайдалану үшін Үкіметаралық комиссияның жұмысын жандандырып, оның қызметін жаңа деңгейге көтеруге шақырдым. Екі ел бизнес өкілдерінің байланысын тереңдету – маңызды міндеттің бірі. Осыған орай, «Қазақстан – Словения» іскерлік кеңесін құру мәселесін талқыладық. Елімізге Словенияның ірі кәсіпкерлері де келді, – деді Қасым-Жомарт Тоқаев.
Тараптар халықаралық және аймақтық өзекті мәселелерді талқылап, ұстанымдарының ортақ екенін жеткізді. Бұдан бөлек, мәдени-гуманитарлық ықпалдастық жайында да пікір алмасты.
– Бүгінгі кездесулер, жалпы бұл сапар Словения мен Қазақстан арасындағы қарым-қатынастың жаңа парағын ашады деп ойлаймын. Екі ел де өзара түсіністік пен құрметке негізделген халықаралық құқық, орнықты даму мен серіктестік қағидаттарын қолдайды. Мен бұған ризамын. Келешекте де осы бағытта жұмыс істей беретінімізге сенімдімін, – деді Словения Президенті Наташа Пирц-Мусар.
Report: 100 млн долларға жуық экспорт келісімі жасалды
Сәуірде ҚР Сауда және интеграция министрі Арман Шаққалиев Шэньси провинциясының әкімшілік орталығы Сиань қаласына бизнес-делегацияны бастап барды. Нәтижесінде, қазақстандық кәсіпкерлер Сиань қаласында өткен сауда экономикалық миссия қорытындысы бойынша $98 млн-ға келісімшарт жасасқан. Ақпаратты Report бөлісті.
Қазір мемлекеттер арасында ынтымақтастық бірқатар бағыттарда өрбуде. Өткен жылдың қорытындысын қарасақ, Қазақстан мен Қытай арасындағы тауар айналымы 6,8%-ға артып, $43,8 млрд-қа жетті. Өткен жылы ШЫҰ саммитінде екі ел басшылары көрсеткішті $80 млрд-қа жеткізу міндетін қойған болатын. 2024 жылы Қазақстан арқылы Қытайдан Еуропаға шамамен 300 пойыз жөнелтілсе, биыл алғашқы екі айында 111-ден астам пойыз жіберілген.
Айта кетейік, 2 сәуірде Сиань қаласында Қазақстанның сауда-экономикалық миссиясы кезінде B2B-кездесулер жемісті аяқталды. Нәтижесінде қазақстандық компаниялар $98 млн сомасына экспорттық келісімшарттарға қол жеткізді. Сондай-ақ QazTrade сауда-экономикалық миссия аясында арнайы көрме ұйымдастырып, азық-түлік саласындағы 50-ге жуық қазақстандық компания өнімін таныстырды.
ТАСС: Жеңіс шеруіне 300 техника шығарылады
Биыл Қазақстанда өтетін Ұлы Отан соғысындағы Жеңістің 80 жылдығына арналған әскери парадқа 300 әскери техниканы шығару жоспарланған. Қазір дайындық жұмыстары басталып, шара барысы пысықталуда. Жаңалықты ресейлік ТАСС ақпарат агенттігі жариялады.
Белгілі болғандай, шеруге 24 парадтық есептоп қатыспақ. Қатысушылардың жалпы саны 4 мыңнан асады, оның 200-ден астамы – әскери қызметтегі қыз-келіншектер. Механикаландырылған лекте 300-дің үстінде жауынгерлік және арнайы техника жүрізіледі. Олардың қатарында тарихи кезеңді көрсететін техника үлгілері де бар. Әуе шеруіне әр түрлі типтегі 66 ұшу аппараты көрсетілетін болды.
Ұлы Отан соғысы жылдарында майданға 1,3 миллионнан астам қазақстандық майданға аттанды, жартысы ұрыс даласында қаза тапқан. Сонымен қатар 500-ден астам қазақстандық «Кеңес Одағының Батыры» атағына ие болды. ҚР Еңбек және халықты әлеуметтік қорғау министрлігінің дерегі бойынша, қазір республикада 120 соғыс ардагері бар.
Euronews: Көшпенділер мерекесі
Апта ортасында Euronews арнасындағы Modern Nomads бағдарламасының кезекті шығарылымы көрсетілді. Бұл жолы бағдарлама тақырыбы Наурыз мерекесіне арналған. Онда Қазақстандағы мерекені тойлау үрдісі мен биылғы жаңалықтар сараланыпты.
Көшпенділер әрбір наурыз айында Наурыз мерекесін тойлайды. Бұл – түркі елдерімен қатар өзге мемлекеттерге ортақ дәстүр. Қазақстанда да маңызды дата атаусыз өтпейді. Мұнда дәстүрлі киім, ұлттық ойындар, дәмді астың түр-түрін көруге болады.
«Қазақстан жыл сайын наурыз айында көктемді қарсы алып, Маңғыстаудағы Отпан тау шыңында қасиетті алау жағады. Бұл ежелгі дәстүр үзілген емес. Әр жылы Кіші жүздің өкілдері кезекпен алау жағу шарасын өткізеді. Биылғы кезек Адайдың Қосай ата ұрпақтарына тиді.
Наурыз мерекесіне арналған фестиваль Қазақстан бойынша өтіп, 21 және 22 наурызда Астанадағы үлкен мерекелермен түйінделеді. Қала алаңдарында ұлттық спорт түрлерін тамашалап, наурыз көже ішуге болады. Сонымен қатар ұлттық қолөнер бұйымын қызықтап, дәстүрлі әнмен сусындап, рухани азық алуға таптырмас мүмкіндік», – делінген бағдарламада.
