Әлемдік көшбасшылар Трамп-Путин келіссөзінің нәтижелеріне қатысты пікір білдірді
АСТАНА. KAZINFORM – Еуропалық көшбасшылар АҚШ пен Ресей президенттері арасындағы Украинаның барлық энергетикалық инфрақұрылымы бойынша дереу атысты тоқтату және келіссөздерді жалғастыру туралы келісімге оң баға берді.
АҚШ-тың арнайы өкілі Стив Уиткофф сейсенбі күні кешке Сауд Арабиясы Ресей мен АҚШ арасындағы жексенбі, 23 наурызда келесі келіссөздерді өткізетінін мәлімдеді, деп хабарлайды DW News.
Келіссөздердің келесі кезеңінде атысты Қара теңізді қоса алғанда, толық тоқтату және бітімгершілік келісімге келу мәселелері талқыланады.
Германияның қызметтен кетіп бара жатқан канцлері Олаф Шольц Украинаның энергетикалық инфрақұрылымындағы атысты тоқтатуды маңызды алғашқы қадам деп атады, бірақ келесі қадам атысты толық тоқтату болуы керек екенін мәлімдеді, деп хабарлайды Global Banking and Finance.
- Келесі қадам Украинадағы атысты толық және мүмкіндігінше тезірек тоқтату болуы керек. Әрине, мұнымен келісетініміз анық, - деді Олаф Шольц.
Шольц Украинасыз және оның еркіне қарсы шешім қабылданбау керектігін қайталады.
Франция президенті Эмманюэль Макрон бұл пікірді қуаттап, Украинаны одан әрі қолдайтынын растады. Ол Трамп-Путин келіссөздерін «дұрыс бағытта жүріп жатыр» деп құптады, деп хабарлайды Global Times.
- Алғашқы қадамдар жасалды, бірақ біздің мақсатымыз өзгеріссіз қалды – толықтай орындалатын, өлшенетін және тексерілетін атысты тоқтату және кепілдіктері бар ұзақ және берік бейбітшілікті қамтамасыз ететін бейбіт келіссөздерді бастау», - деді Э.Макрон.
Украина президенті Владимир Зеленский «егер атысты ішінара тоқтату болса, бұл оң нәтиже болатынын» мойындады, деп хабарлады Newsweek.
Алайда ол келіссөздерде толық ашықтық қажеттігін атап өтті.
- Әңгіменің не туралы екенін түсінуіміз керек, егжей-тегжейі қандай? Біз толық хабардар боламыз және серіктестер бізбен бәрін талқылайды деп үміттенемін, - деді ол.
Кейінірек Владимир Зеленский тілшілерге берген сұхбатында энергетикалық инфрақұрылым бойынша атысты тоқтатуды қолдап, Ақ үйден Ресеймен нақты не талқыланғаны туралы түсінік алғысы келетінін атап өтті, деп хабарлайды Yahoo News.
- Менің ойымша, егер біз президент Трамппен сөйлесіп, ресейліктердің америкалықтарға не ұсынғанын немесе америкалықтардың ресейліктерге не ұсынғанын егжей-тегжейлі білсек, дұрыс болар еді, - деді В.Зеленский.
Осыған дейін Путин мен Трамп телефон арқылы сөйлескенін жаздық.
Ақорданың баспасөз қызметі Қазақстан Президентінің осы келіссөздердің қорытындысын қолдайтынын жеткізді.
Путин мен Трамптың телефонмен жүргізілген келіссөздерінің қорытындысы мына сілтемеде.
Трамп өзінің Путинмен арадағы әңгімесі туралы пікірін жазды.
