Әлихан Бәйменов: Қазақстанда 210 мыңнан астам адам тоғызқұмалақ ойнайды

АСТАНА. KAZINFORM — Дүниежүзілік және республикалық тоғызқұмалақ федерациясының президенті Әлихан Байменов Kazinform тілшісіне тоғызқұмалақ ойынының даму барысы жайында айтып берді.

Оның айтуынша, тоғызқұмалақ ойыны тек Қазақстанда ғана емес, халықаралық деңгейдеде қарқынды дамып келеді.

— Ел ішінде 210 мыңнан астам адам тоғызқұмалақ секциясында тұрақты айналысады. Ал осы жарысқа әлемнің 41 елінен келген ойыншылар қатысуда. Атқарылған жұмыс қатарында біріншіден әлемнің түкпір-түкпіріндегі зияткерлік ойын жанашырларымен қарым-қатынас орнатып жатырмыз. Екіншіден, әлемге кең танымал igGameCenter және Playok сайтымен байланыс орнаттық. Соның арқасында тоғызқұмалақ осы екі сайтта ең көп ойналатын ойындар қатарына еніп отыр, — деді федерация президенті.

Оның айтуынша, 100-ден астам елдің ойыншылары тоғызқұмалақты онлайн ойнайды.

— IP адресін тексеріп көргенде, 100-ден астам елдің азаматы тоғызқұмалақ ойнайтыны белгілі болды. Сонымен бірге бұқаралық сипатта насихаттау үшін 2028 бала бір мезетте тоғызқұмалақ ойнап, Гиннес рекордын жасадық. Ал жақында 213 мың адам ойынды онлайн режимде ойнаса, күні кеше ғана тоғызқұмалақтың тақтасы алғаш рет стратосфера қабатына көтерілді, — дейді ол.

Бәйменов тоғызқұмалақ спортын насихаттау үшін жан-жақты жұмыс атқарылып жатқанын айтты.

— Бұл ретте біз Туризм және спорт министрлігімен, тиісті комитетпен және қала-аудан әкімдерімен, сонымен қатар ұлттық ойынымыздың жанашыр кәсіпкелерімен тығыз әріптестік орнатып, кең ауқымда жұмыс жасап жатырмыз, — деді федерация басшысы.

Сөз соңында Әлихан Байменов БАҚ өкілдеріне алғыс айтты.

— Осы сәтті пайдалана отырып, қазақстандық бұқаралық ақпарат құралдарына шын жүректен рахметімді айтқым келеді. Сіздер тоғызқұмалақты насихаттау, дәріптеу ісінде үлкен үлес қосып жүрсіздер, — деді Бәйменов.

Айта кетейік, V Дүниежүзілік көшпенділер ойындарының тоғызқұмалақ бәсекесі Астана қаласындағы «Думан» қонақ үйінде өтіп жатыр.