«Алқаптан үстелге дейін»: Өсімдік шаруашылығының жаңа ақпараттық жүйесі енгізілмек

АСТАНА. KAZINFORM – Елімізде өсімдік шаруашылығын қадағалаудың жаңа ақпараттық жүйесі сынақтан өткізіліп жатыр. Жобаны қолданысқа енгізу үшін 714 млн теңге қаржы қажет. Бұл туралы Үкімет отырысында ҚР АШМ басшысы Айдарбек Сапаров айтты.

— Қазіргі қолданыстағы өсімдік шаруашылығы өнімдерін қадағалау жүйесі тек тауарларға ілеспе құжаттарды беру кезінде туындайды. Бұл осы жүйеде толық қадағалауды қамтымайды. Жаңа цифрлық жүйе өсімдік шаруашылығындағы өндіріс циклін «алқаптан үстелге дейін» толық қамтып, өндірілген өнімді өткізу процестерін бақылау мен қауіпсіздігін қамтамасыз етуге үлкен мүмкіндік береді, - деді ол. 

Сондай-ақ министр өсімдік шаруашылығы объектілерінде егіс алқаптарын, тарихи деректерді, ауыспалы егісті, орташа өнімділікті, сақтау көлемін паспорттауды енгізу жоспарланып отырғанын айтты. Бұл өнімнің шығу тегінің ашықтығын қамтамасыз етеді. 

— Аталған жүйе 2025 жылдан бастап Ақмола облысында техникалық сынақтан өтуде. Жүйенің инвестициялық жобасы Цифрландыру министрлігімен келісілді. Жүйені толыққанды іске қосу үшін 714 млн. теңгені қажет етуде. Осыған байланысты Олжас Абайұлы, Үкіметтен осы жүйені іске асыру үшін Министрлікке қосымша қаражат бөлу мәселесін қолдауды сұраймын, - деді Айдарбек Сапаров.

Айта кетейік, елімізде бидай егу азайып, рентабельділігі жоғары дақылдар аумағы арттырылып жатыр.

Сондай-ақ ауыл шаруашылығы кәсіпкерлеріне жеңілдетілген лизингке қаржы бөлу қашан басталатынын жазған едік.