Алматы әуежайында түкірген шетелдікке айыппұл салынып, рейстен түсірілді

АЛМАТЫ. KAZINFORM - Алматы әуежайындағы желілік полиция бөлімінің қызметкерлері Алматы–Шымкент рейсімен ұшпақшы болған жолаушыны ұстады. 

Көліктегі полиция департаментінің мәліметінше, тәртіп сақшылары тексеру барысында жолаушы 34 жастағы Қытай азаматы екенін анықтаған. 

- Ол рейске отырғызу кезінде күту залында, яғни қоғамдық жерде түкіріп, айналасындағы азаматтарға құрметсіздік танытып, жалпы қоғамдық орынды ластаған. Құқықбұзушы 5 АЕК (19 660 теңге) көлемінде айыппұл арқалап, рейстен түсірілді, - деп хабарлады департаменттен. 

Еске салайық, бұған дейін Зайсан, Катонқарағай және Кендірлі курорттық аймақтарында әуежай құрылысы басталғанын жазғанбыз.