Алматы әуежайының басшысы Альп Эр Тунга Эрсой қызметінен кетті
АЛМАТЫ. KAZINFORM – «Алматы халықаралық әуежайы» АҚ президенті Альп Эр Тунга Эрсой орнын босатты.
«Жоспарланғандай, Альп Эр Тунга Эрсой Алматы халықаралық әуежайдың жаңа халықаралық терминалының құрылысы аяқталған соң қызметінен кетті. Ол саладағы мансабын жаңа қызметте жалғастырады», - деп хабарлады әуежайдың баспасөз қызметі.
Басшылықтың ауысуы туралы ресми мәлімдеме 5 маусымда жарияланады.
Айта кетейк, бірінші маусым күні Алматы әуежайының жаңа терминалы алғашқы рейстерді қабылдаған болатын.
Президент Қасым-Жомарт Тоқаевтың Алматыға жұмыс сапары барысында қала әуежайының жаңа халықаралық терминалын аралап көрген еді.
Ғимараттың жалпы ауданы — 53,5 мың шаршы метр, жылына 14 миллион жолаушыға қызмет көрсете алады.
Еске салайық, 2020 жылы Алматы әуежайы түрік компаниясын 415 миллион долларға сатылған еді.
