12:00, 28 Тамыз 2024 | GMT +5
Алматы облысында итті көлікпен сүйреген адамның үстінен іс қозғалды
ҚОНАЕВ.KAZINFORM – Әлеуметтік желіде көлікке байланған иттің бейнежазбасы тарады. Онда оқиғаның Алматы облысы Жандосов ауылында болғаны айтылған.
– Жандосов ауылы. Итті көлікке байлап қойып сүйреді. Ит тұншығып қалды. Тоқтатып, оны босатқыздық. Ол бастығының итті осылай шығарып тастауды бұйырғанын айтты, - делінген бейнежазбада.
Алматы облысының Полиция департаментінде аталған жағдай бойынша күдікті ұсталып, қылмыстық іс қозғалғанын хабарлады.
– Күдіктіні Қарасай ауданының полицейлері анықтап, ұстады. Оған қатысты жануарларға қатыгездік жасау бойынша қылмыстық іс қозғалды, - деп хабарлады облыстық ПД.
Еске салайық, бұған дейін Қонаев қаласындағы ескі гараждар бұзылып, орнына басқа нысандар салынатынын жазғанбыз.
