Алматы облысында тұтынушы құқығының бұзылуы 68 пайызға өскен

ҚОНАЕВ. KAZINFORM - Алматы облысында жыл басынан бері Сауда және тұтынушылардың құқықтарын қорғау департаментіне 800-ден астам өтініш келіп түсті. Бұл өткен жылмен салыстырғанда 67 пайызға көп.

Алматы облысы бойынша Сауда және тұтынушылардың құқықтарын қорғау департаментінің басшысы Нұрсұлтан Жұмәділдің айтуынша, тұрғындардың құқықтық сауатының артуы мен өз мәселелерін шешуге деген белсенділігінің нәтижесінде 21 миллион 361 мың теңге көлемінде тұтынушыларға өтемақы қайтарылды. Бұл көрсеткіш былтырғы жылмен салыстырғанда 68 пайызға жоғары.

Бұдан бөлек, департамент жоспардан тыс тексерулер жүргізіп, 16 әкімшілік іс қозғаған. Нәтижесінде, әр іске 30 айлық есептік көрсеткіш көлемінде, яғни 110 760 теңге айыппұл салынды.

Департамент басшысы облыстық мәслихат өкілдерімен, қоғамдық ұйымдармен бірлесіп, «Сапалы өнім» жобасы жүзеге асырылып жатқанын атап өтті.

«Біз тұрғындардың құқықтық сауатын арттыру және тұтынушылардың құқықтарын қорғау мәдениетін қалыптастыру үшін белсенді жұмыс істеп келеміз. Өнімдер қауіпсіздік талаптарына сай болмаған жағдайда өндіруші кәсіпкерлерді жауапкершілікке тарту шаралары жалғаса береді», – деді Нұрсұлтан Жұмәділ.

Сонымен қатар облыс бойынша «жасырын сатып алушы» әдісі арқылы азық-түлік және азық-түлікке жатпайтын өнімдердің 15-тен 40-қа дейін үлгісі тіркеуден өткен зертханаларға жіберілген. Кейбір өнімдердің сапа стандарттарына сәйкес келмеуі анықталып, тиісті іс-шаралар қолданылған.

Еске салайық, бұған дейін Атырау облысында құқығы бұзылған тұтынушыларға 14 млн теңге қайтарылғанын жазғанбыз.