Алматы тауларында биыл 400-ге жуық адам құтқарылды

АЛМАТЫ. KAZINFORM - Алматыда күн сайын 50-ден астам құтқарушы, 12 техника және 19 ит кезекшілікке шығып, төтенше жағдайға тап болған алматылықтарға көмекке келеді. Бұл туралы Алматы қаласы бойынша Төтенше жағдайларды жою басқармасының басшысы, азаматтық қорғау подполковнигі Дмитрий Ярцев және құтқару қызметінің өкілі Хозы Бүркітбайхан айтып берді.

Дмитрий Ярцевтің айтуынша, Алматыда екі негізгі құтқару жасағы — Республикалық жедел-құтқару жасағы (РЖҚЖ) және құтқару қызметі жұмыс істейді. Олардың құрамында 308 адам және 447 техника, үш тікұшақ бар. Күн сайын 7 техника және 6 қызметтік иті бар РЖҚЖ-ның 42 қызметкері, сондай-ақ 5 техникасы және 13 иті бар 14 құтқару қызметінің қызметкері кезекшілікте болады.

Сондай-ақ ТЖД өкілі «Құтқарушылар мен жолсеріктерді тауға даярлау орталығы», «Лидер KZ» және Альпинизм федерациясы сияқты еріктілер ұйымдарымен маңызды өзара іс-қимыл барын атап өтті. Бүгінгі таңда спортшыларды, альпинистерді және жол талғамайтын көліктердің иелерін қосқанда 258 құтқарушы еріктілер тіркелген.

– 2024 жылдың алғашқы тоғыз айында 210 іздеу-құтқару операциясы жүргізілді, оның 208-і тауда болды. Нәтижесінде 396 адам, оның ішінде 59 бала құтқарылды, - деді құтқару қызметінің өкілі Хозы Бүркітбайхан.

Еске салайық, бұған дейін Алматыда ер адам өзенге құлаған баланы құтқарып қалғанын жазғанбыз.