Алматы циркі мен қалалық зообақтың жаңа жобасы 100 млн теңгеге әзірленіп жатыр

АЛМАТЫ. KAZINFORM — Бұл туралы Алматыда қалалық мәслихаттың кезекті XXVIII сессиясында айтылды. 

Алматы қаласы Қаржы басқармасының басшысы Қанат Сухамбеков мәслихат депутаттарының алдында 2025 жылға арналған алғашқы нақтыланған бюджеттің жобасын таныстырды.

Ол қаланың мәдени нысандарын дамыту мақсатында Алматы циркі және қалалық зоопаркті жаңғыртуға ерекше көңіл бөлінетінін атап өтті. Айтуынша, асы жобаларды жүзеге асыру үшін 100 млн теңгеге екі жобалау-сметалық құжаттама әзірленіп жатыр.

Одан бөлек Қанат Сухамбеков Н.Сац атындағы балалар мен жасөспірімдерге арналған мемлекеттік академиялық театрды қайта құру жобасына тоқталды.

— Биыл театрдың 80 жылдығы және бұл жоба оның мәдени мұрасын сақтау мен дамыту үшін маңызды қадам болмақ. Қайта құру жұмыстары аясында 5 млрд теңге көзделген, жаңғырту жұмыстары көрермендер мен әртістер үшін жаңа мүмкіндіктер ашады. Жобаның жалпы сомасы 24,2 млрд теңге, — деді ол.

Еске салайық, бұған дейін Н. Сац атындағы театрды жөндеуге 21,7 млрд теңге бөлінгенін жазғанбыз.