Алматы тұрғыны сапасыз жиһаз сатқан компаниядан 1,1 млн өндіріп алды

АЛМАТЫ. KAZINFORM - Алматы қаласы Әуезов ауданының №2 сотында қала тұрғынының компаниямен жасалған келісімшартты бұзу және 1,1 млн теңге өндіру туралы талап арызы бойынша азаматтық іс қаралды.

Алматы сотының мәліметіне сәйкес, қала тұрғыны компанияға 1,6 млн теңгеге жеке жоба бойынша жиһаз жасап, орнатуға тапсырыс берген. Ол 1,1 млн теңгені (70%) алдын ала төлеп, қалған 30%-ын жұмыс аяқталғаннан кейін төлеуі керек болған. Ал компания жиһазды 25 жұмыс күні ішінде өндіруге міндеттелген.

Алайда белгіленген мерзімде міндеттемелер орындалмаған. Сондай-ақ тапсырыс берушінің кешіге орнатылған жиһазға көңілі толмады. Компания кемшіліктерді жою туралы өтініштерді 6 ай бойы орындамаған.

- «Тұтынушылардың құқықтарын қорғау туралы» Заңның 13-бабына сәйкес, егер заңнамада белгіленген тәртіппен тауардың (жұмыстың, көрсетілген қызметтің) сапасына қойылатын міндетті талаптар көзделсе, тұтынушының осы талаптарға сай келетін тауарды (жұмысты, көрсетілген қызметті) алуға құқығы бар. Сот тапсырыс берушінің талаптарын заңды және негізді деп танып, тапсырыс беруші мен ЖШС-і арасындағы қызмет көрсету шартын бұзды. ЖШС-нен тапсырыс берушінің пайдасына 1,1 млн. теңге өндірілді, - деп хабарлады қалалық соттан.

Шешім заңды күшіне енген жоқ.

Еске салайық, бұған дейін Алматы облысында Өрт сөндіру қызметі үйі өртенген тұрғынға 11 млн теңге төлеуге міндеттелгенін жазғанбыз.