Алматыда 20 мыңға жуық адам тұмау және ЖРВИ жұқтырған

АЛМАТЫ. KAZINFORM - Алматыда көктем келісімен тұмау жұқтырғандардың саны артқан.

Алматы санитариялық-эпидемиологиялық бақылау департаментінің мәліметінше, өткен аптада ЖРВИ, тұмау ауруларының 18 515 жағдайы тіркелген. Бұл көрсеткіш өткен жылдың осы кезеңімен салыстырғанда 7,7 пайызға (16622 жағдай) жоғары. Сондай-ақ ресми дерекке сәйкес, тұмау жұқтырғандардың 60,5 пайызы - балалар (11195 жағдай).

- Алматы қаласы бойынша қазіргі уақытта жедел респираторлық инфекциялардың бақылау деңгейінен аспайтын маусымдық өсуі байқалады. Қалада ЖРВИ мен тұмаудан бөлек риновирус, бокавирус, РС вирус, аденовирус, парагрипп, маусымдық коронавирустар айналымда жүр. Сондықтан аурудың алдын алу шараларын орындауға кеңес береміз, - деді Алматы қаласының Бас мемлекеттік санитариялық дәрігері Қасымхан Алпысбайұлы.

Еске салайық, бұған дейін СҚО-да тұмауға жатпайтын вирустардың жеті түрі тарап жатқанын жазғанбыз.