Алматыда Әлия мен Мәншүк саябағын реконструкциялау қашан аяқталады
АЛМАТЫ. KAZINFORM – Алматыда өткен жылы көктемде Қазақ – Британ техникалық университетіне қарама-қарсы орналасқан Әлия мен Мәншүк саябағын реконструкциялау жұмыстары бітуі тиіс болған. Алайда мердігер ұйым жұмыстарды бастағанмен аяқсыз қалдырған. Бүгінде алматылықтардың сүйікті орнына айналған жер қоршау ішінде тұр. Онда ешқандай жұмыстар жүріп жатқан жоқ. Kazinform фототілшісі саябақты аралап, оның қазіргі бет-бейнесін суретке түсірді.
2022 жылдың 15 қыркүйек күні Алматы қаласының экология және қоршаған орта басқармасы «ШАХ құрылыс компаниясы» ЖШС мердігер ұйымымен Байсейітова көшесінің Қабанбай батыр көшесінен Бөгенбай батыр көшесіне дейінгі аралық пен Мәншүк Мәметова скверін абаттандыру және реконструкциялау жұмыстарын жүргізу бойынша келісімшарт жасасқан.
«Сыржоба» ЖШС мердігер ұйымы скверді реконструкциялау жоспарын әзірлеген еді. Ол бойынша оң қорытынды алынды. Нысанның құрылысы 2023 жылдың 31 мамыр күні аяқталады деп жоспарланған. Алайда, мердігер ұйым 2023 жылдың қаңтар айынан мамыр айына дейін ешқандай жұмыстар істемеген. Осыған байланысты басқарма мердігер ұйымның атына шартты біржақты тәртіппен бұзу және жеткізушіні мемлекеттік сатып алудың жосықсыз қатысушысы деп тану туралы сотқа жүгіну ниеті туралы хабарлама жолдады», - деп хабарлады қалалық Экология және қоршаған орта басқармасы.
Хабарламаны алған соң мердігер ұйым нысанда бөлшектеу жұмыстары мен абаттандыру жұмыстарының бір бөлігін жүргізуді бастады. Алайда жұмыс кестесінен көп артта қалушылықты ескере отырып және теріс салдарын болдырмау үшін басқарма жеткізушіні мемлекеттік сатып алуға жосықсыз қатысушы деп тану туралы сотқа талап арыз жіберді.
«Кейін басқарма мен мердігер ұйымы арасында келісімшарт бұзылды. Жеткізуші мемлекеттік сатып алудың жосықсыз қатысушысы болып танылды. Қазіргі уақытта мердігер ұйымды анықтау бойынша конкурстық рәсімдер жүргізілуде, ол биыл мамыр айында аяқталады. Құрылыс-монтаж жұмыстарын биылғы қараша айының соңына дейін аяқтау жоспарланып отыр», - деп хабарлады ведомстводан.
Сондай-ақ қалалық Экология және қоршаған орта басқармасы Әлия мен Мәншүк саябағында қанша ағаштың кесілгенін хабарлады.
«2023 жылдың күзінде саябақта басқарма ғылыми қызметкерлермен, экобелсенділермен бірлесіп, қатты жауын-шашын мен қатты желдің салдарынан ауа райының нашарлауы кезінде құлау қаупін тудыратын 130-ға жуық құрғақ апатты ағашты кесіп тастады. Әлия мен Мәншүк саябағында барлығы 1681 ағаш өседі. Кесілген ағаштардың орнына саябақта 150-ден астам жас көшет отырғызылды», - деп түсіндірді басқармадан.
Еске салайық, Алматы әкімі өткен жылдың соңына дейін Әлия мен Мәншүк саябағы жөнделіп, абаттандырылатынын айтқан болатын.
