Алматыда апатты көпірдің орнына жаңасы салынады
АЛМАТЫ. KAZINFORM – Есентай өзені арқылы өтетін көлік көпірі апатты деп танылды. Осыған байланысты қала басшысының тапрсымасымен жаңасы салынады.
Алматы әкімдігінен мәлім еткендей, осы жылдың қазан айында Кемел шағын ауданында Ерболат Досаевтың тапсырмасымен апатты көпірдің орнына жаңасы салынады.
Жарты ғасыр бұрын пайдалануға берілген көпір Жолымбет көшесінде орналасқан. Көпір апатты деп танылғандықтан, онда мамыр айының соңынан бері көлік қозғалысы шектелді.
«Өткен ғасырдың 60-жылдарында салынған көпір құрылымы ешқашан жөнделмеген және жарамсыз болып қалған. Көпір тіректерінде қауіпті жарықтар пайда болды, бетон конструкциялары жартылай бұзылды. Көпірді көзбен шолып тексеру барысында көпірге кіреберістерде үйінділердің, сондай-ақ көпірдің беткейлеріндегі топырақтың шөгуі анықталды»,-деп хабарлады әкімдіктен.
Алматы әкімі Ерболат Досаевқа қалалық мобилділік басқармасының басшысы Сағындық Телібаев, көпірді техникалық тексеру деформациялық тігістің жоқтығын анықтағандарын жеткізді. Мұның бәрі құрылымның жүк көтергіштігіне және оның беріктігіне әсер етеді. Демек, көпірді жөндеу мүмкін емес. Сондықтан жаңасын салу қажет.
Жаңа көпірдің жобасы қадалар негізі бар бір аралықты құрылысты, сондай-ақ көпірге кіреберістердің жүріс бөлігін қайта құруды көздейді. Жаңа құрылым ескіден әлдеқайда үлкен болады. Сонымен, егер апаттық көпірдің ұзындығы 16,8 метр, ені 8,5 метр және тіректердің биіктігі 7 метр болса, онда жаңа көпірдің ұзындығы 24 метр, ені 13,5 метр, биіктігі 9 метр болады. Бұл көпірден өтуді жолмен бір деңгейде қамтамасыз етуге мүмкіндік береді.
Жаяу жүргіншілердің жайлылығы мен қауіпсіздігін қамтамасыз ету үшін Ерболат Досаев екі жақтан да тротуарларды жайластыруды, сондай – ақ көпір «Кемел», «Көкжиек» шағын аудандары мен «Қоянқұс», «Ынтымақ», Жаңадәуір, Жаңаталап поселкелері тұрғындары үшін көлік байланысын қамтамасыз ететіндігін ескеріп, қысқа мерзімде жұмыстар жүргізуді тапсырды.
«Бұл әлеуметтік маңызы бар нысан, көпір арқылы бірнеше автобус маршруттары, соның ішінде мектеп маршруттары өтеді, сондықтан барынша қысқа мерзімде жол қозғалысының қамтамасыз ету керек. Қажетті қаражат бөлінетін болады, қозғалыс осы жылдың қазан айында ашылуы тиіс. Көпір ондаған жыл бойы адамдарға қызмет ететіндей сапалы болғаны жөн», - деп атап өтті Ерболат Досаев.
Қазіргі уақытта жаңа көпір салу бойынша жөндеу жұмыстары аяқталғанға дейін автокөлік иелері аталған учаскені Мұхамеджан Сералин көшесі арқылы айналып өте алады.
