Алматыда кенемен күреске 144 млн теңге бөлінді

АЛМАТЫ. KAZINFORM — Алматыда халықты кене энцефалитінен қорғауға бағытталған кенеге қарсы ауқымды шаралар жүріп жатыр.

Бұл туралы қалалық дезинфекция орталығының директоры Айнұр Аққошқарова өңірлік коммуникациялар қызметінде өткен баспасөз мәслихатында айтты.

Спикердің сөзінше, Алматыда орманды алқап пен қала саябақтарында, скверлерінде кенелерге қарсы дезинфекциялық өңдеу жұмыстарының 1 кезеңі басталды. Жалпы өңделетін аумақ 4 733,12 гектар. Бұл іс-шараларға 144 152 000 теңге бөлінді, бірінші кезеңге 72 млн теңге жұмсалады.

— Биыл жаңа «Ципертрин» препараты қолданылатын болады. Препарат гектарына 0,75 литр тұтыну нормасымен 3 579,6 литр көлемінде сатып алынды. Кенелердің тәуелділігін болдырмау үшін құралдар жыл сайын жаңартылып отырады. Мысалы, 2023 жылы «Фаворит В.К. Е.», 2024 жылы «Дельтекс» қолданылды, — дейді ол.

Айтуынша, жұмыстар арнайы дайындықтан өткен дезинструкторлар мен дезинфекторлар тарапынан жүргізіліп жатыр. Барлық маман тұрақты түрде нұсқаулықтан өтіп, қажетті жабдықтармен толық қамтамасыз етілген.

— Қазір орталықтың қарамағында ыстық және суық тұман термогенераторларымен, гидропульттермен, «Фазенда» бүріккіштерімен, сондай-ақ автокөліктермен жабдықталған екі мобильді бригада бар. 2025 жылы үш жаңа жабдық және 5 мыңнан астам жеке қорғаныс құралдары сатып алынды, — деп атап өтті Айнұр Аққошқарова.

Осыған дейін ШҚО-да кенеден зардап шеккендер саны 80-ге жуықтағаны туралы жазғанбыз.