Алматыда жаңбыр жауып, найзағай ойнайды: коммуналдық қызмет күшейтілген режимге көшті

АЛМАТЫ. KAZINFORM – Күн райының бұзылуына байланысты Алматының коммуналдық қызметі күшейтілген жұмыс режиміне көшті.

Қазгидрометтің болжауынша, Алматыда 5-6 сәуір аралығында нөсер жауын жауып, найзағай ойнап, желдің екпіні секундына шамамен 15-20 метрге жетеді.Таулы аймақта қар аралас жаңбыр жаууы ықтимал.

Осыған байланысты қаланың коммуналдық қызмет күшейтілген режимде жұмыс істейді.

– Ықтимал су басудың алдын алу және салдарын жою мақсатында коммуналдық қызметтің, құтқару қызметі мен ТЖД-ның барлық техникасы әзір. 4200 қап құм дайындалған. Су басуы мүмкін учаскеде түнгі уақыттан бастап ассенизатор машинасы мен мотопомпа жабдықталған бригадалар кезекшілік атқарады, – деп хабарлады әкімдіктен.

Сонымен қатар жауын-шашын кезеңінде жергілікті су басудың алдын алу және оларды жою үшін мотопомпалар мен арнайы құралдармен жабдықталған жедел бригадалар жұмыс істейді.

Бұған дейін Tasqyn жүйесі 251 өзеннің су деңгейін бақылап отырғаны туралы жазған едік.