Алматыда жер неліктен жасыл түске боялып жатыр - әкімдік жауап берді
АЛМАТЫ. KAZINFORM - Алматы әкімдігі жол бойындағы жасыл түске боялған жерлер туралы желідегі суреттерге түсініктеме берді.
Қала әкімдігінің мәліметінше, Жароков, Жандосов, Сәтбаев көшелері мен әл-Фараби даңғылы бойында жол бөлігі мен тротуар арасындағы жасыл аймақтарды көгалдандыру бойынша жоспарлы жұмыстар жүргізіліп жатыр. Мұнда көгалдандыру үшін гидросебу әдісі қолданылған.
- Гидросебу – газон шөбінің тұқымын гидроегу құрылғысы арқылы себу тәсілі. Бұл әдісте тұқым табиғи жасыл бояғышпен гидрогель, бекіткіш, синтетикалық талшықтар, топырақ жақсартқыштар және тыңайтқыштар араластырылған қоспа түрінде дайындалады. Бұл шөпті тегіс емес жерлерде және үлкен көлемде отырғызуға мүмкіндік беретін заманауи көгалдандыру технологиясы. Мұндай әдіспен қала саябақтары мен скверлері көгалдандырылады, - деп хабарлады әкімдіктен.
Еске салайық, бұған дейін Алматы облысында зираттың құлыптастарын қиратқан күдікті ұсталғанын жазғанбыз.
