20:22, 03 Сәуір 2025 | GMT +5
Алматыда жол апатынан тағы 7 жасар бала мерт болды
АЛМАТЫ. KAZINFORM - Алмалы ауданында жеңіл көлік 7 жасар баланы қағып кетті.
Алматы қаласы Полиция департаментінің мәліметінше, жол-көлік оқиғасы сағат 15:30да болған.
- Jetour маркалы көлік жүргізушісі Байзақов көшесімен солтүстік бағытта келе жатып, белгіленбеген жерде жолдан өткен 7 жасар баланы қағып кетті. Соққы әсерінен бала қарама-қарсы бағытта келе жатқан Хундай көлігіне соқтығысты. Өкінішке қарай, бала алған жарақаттарынан оқиға орнында қайтыс болды, - деп хабарлады ПД баспасөз қызметі.
Полиция департаменті адам өліміне әкеп соққан жол-көлік оқиғасы фактісі бойынша (ҚР ҚК 345-бабы 3-бөлігі) қылмыстық іс қозғады.
Еске салайық, кеше Алматыда жүк көлігі 7 жасар қызды басып кетті.
